![](/static/articles/01/54/01/l-qLZAP7B27f.jpg)
Նոր օրերի ֆուտբոլային գուշակը՝ կզաքիս Ֆրեդը
Խարկովի կենդանաբանական այգու կզաքիս Ֆրեդը գերմանաբնակ ութոտնուկ Պաուլի հաջորդը կարող է համարվել: Ֆրեդը գուշակել է «Եվրո-2012»-ի 4 խաղից 3-ի արդյունքները: Նա գուշակություններ է անում ամեն օր Խարկովի ֆան-գոտում: Ուկրաինայի հարեւան Լեհաստանը, որը նույնպես մրցաշարի տանտեր է, ընտրել է էգ փիղ Չիտային, որն ապրում է Կրակովի գազանանոցում ու գուշակում է Լեհաստանի խաղերի արդյունքները, խոզուկ Ֆունտիկն էլ աշխատում է Կիեւի ֆան-գոտում: Խարկովում գուշակություններ անող կենդանիների մեջ կզաքիսները մեծ համբավ ունեն այն պատճառով, որ տեղի «Մետալիստ» թիմի համար անցած մրցաշրջանում Խորխե անունով կզաքիսը նման գուշակություններ էր անում եւ դարձել է թիմի թալիսմանը:
Խորխեն ու Ֆրեդն ապրում են նույն կենդանաբանական այգում, որը ամենահինն է երկրում, հիմնադրվել է 1896-ին: Ֆրեդը 3 տարեկան է, նրան պահել են պատանի բնասերները: Կզաքիսը շատ է խաղացել երեխաների հետ եւ նրանց հետ հեռուստացույց դիտել՝ հատկապես մեծ հետաքրքրություն դրսեւորելով ֆուտբոլի հանդեպ: «Եվրո-2012»-ից առաջ այգու ղեկավարությունը որոշել է կենդանուն գուշակ դարձնել:
Ֆրեդի մեթոդը չի տարբերվում նրանից, ինչ որ կրառվում էր ութոտնուկ Պաուլի դեպքում: Բացման խաղից առաջ Ֆրեդը հրաժարվել է ուտել Հունաստանի կամ Լեհաստանի դրոշներով ամաններից՝ այդպիսով գուշակելով ոչ-ոքի, ինչը եւ տեղի ունեցավ Վարշավայի խաղադաշտում՝ 1-1: Նույն բանը գազանիկն արել է նաեւ մի փոքր անց, երբ պետք է գուշակեր Ռուսաստանի ու Չեխիայի հանդիպման արդյունքը: Սա եղել է Ֆրեդի միակ սխալը, քանզի ռուսները հաղթել են 4-1 հաշվով:
Սակայն դրանից հետո Ֆրեդը միանգամայն ճիշտ է գուշակել դանիացիների հաղթանակը հոլանդացիների եւ գերմանացիների հաղթանակը պորտուգալացիների հանդեպ:
Լուս.՝ uefa.com-ի
Մեկնաբանել