Որքանով են թանկացել սննդամթերքն ու մյուս ապրանքները փետրվարին
Այս տարվա փետրվարին, 2022 թվականի փետրվարի համեմատ, Հայաստանում 8.1% գնաճ է գրանցվել, ինչը նշանակում է, որ, գոնե, տարվա սկզբի դրությամբ գնաճը չի նահանջել։ Հունվարին ևս 12-ամսյա գնաճը ճիշտ նույնն է կազմել։ Սննդամթերքի և ծառայությունների որոշ տեսակներ շարունակում են երկնիշ տեմպով թանկանալ։ Այս մասին են վկայում Վիճակագրական կոմիտեի (ՀՀ ՎԿ) տվյալները։
Սննդամթերքը թանկացել է 9.8%-ով
Սննդամթերքն ու ոչ ալկոհոլային խմիչքը թանկացել են 9.8%-ով։ Օրինակ՝ մրգերը թանկացել են 14.1%-ով, հացաբուլկեղենն ու ձավարեղենը՝ 11.8%-ով, կաթնամթերքը, պանիրն ու ձուն՝ 11.4%-ով և այլն։
Երկնիշ տեմպով թանկանում են նաև ծխախոտն ու ալկոհոլային խմիչքը։
Հատկանշական է, որ Վիճակագրական կոմիտեի առանձացրած խոշոր ապրանքախմբերից և ոչ մեկում գնանկում չի գրանցվել։ Միայն ծովամթերքն է, որի գները մնացել են նույնը։ Համեմատաբար ցածր գնաճ է գրանցվել յուղեր և ճարպեր ապրանքախմբում, որի մեջ ներառվում է նաև ձեթը՝ բուսական յուղը։
Ոչ պարենային ապրանքների գները բարձրացել են 5.4%-ով
2023թ. փետրվարին 2022թ. փետրվարի համեմատ ոչ պարենային ապրանքների շուկայում արձանագրվել է 5.4% գնաճ։ Օրինակ՝ հագուստը թանկացել է 7.3%-ով, կոշիկը՝ 8.5%-ով, խոշոր կենցաղային սարքերը՝ 9%-ով, կարճատև օգտագործման կենցաղային ապրանքները, որոնց ներքո պետք է հասկանալ տնտեսական կենցաղային պարագաները՝ ամանի հեղուկ, մաքրող միջոցներ և այլն, թանկացել են 18%-ով։
Ոչ պարենային որոշ ապրանքախմբերում Վիճկոմիտեն գնանկում է արձանագրել։ Ոսկերչական զարդերը էժանացել են 10%-ով։
Էժանացել է նաև վառելիքը։ 2023թ. փետրվարին հունվարի համեմատ բենզինի և դիզելային վառելիքի գները նվազել են 8.5% և 4.7%-ով: Իսկ 2023թ. փետրվարին 2022թ. փետրվարի համեմատ հանրապետությունում գրանցվել է բենզինի՝ 29.4% գնանկում և դիզելային վառելիքի՝ 3.0% գնաճ:
Ծառայությունների սակագները բարձրացել են 7.4%-ով
Բնակչությանը մատուցված ծառայությունների ոլորտում 2023թ. փետրվարին 2022թ. փետրվարի համեմատ սակագներն աճել են 7.4%-ով։
Մասնավորապես, տրանսպորտային ծառայությունները, որոնց մեջ են ներառվում տաքսիները, սակագները բարձրացրել են միջինը 17.7%-ով, հյուրանոցային ծառայությունները՝ 12.9%-ով, սպասարկման ծառայությունները՝ 9.4%-ով և այլն։
Արտարժույթի շուկա
2023թ. փետրվարին ԱՄՆ դոլարի նկատմամբ հայկական դրամի միջին հաշվարկային փոխարժեքը կազմել է 393.4 դրամ, ինչը 18.1%-ով ցածր է 2022թ. փետրվարի համապատասխան ցուցանիշից (480.2դրամ):
Մեկնաբանել