Պտտվող լուրերի համաձայն՝ օրերս Մոսկվայում գտնվող հայտնի «Արարատ Հայաթում» իրար են հանդիպել ՌՀՄ նախագահ Արա Աբրահամյանը, «Տաշիր գրուպի» նախագահ Սամվել Կարապետյանը՝ Կալուգայի Սամվելը, և Ուկրաինայում ՀՀ արտակարգ և լիազոր դեսպան Անդրանիկ Մանուկյանը:

Հանդիպման ընթացքում երեք տարբեր տրամաչափի մեծահարուստները քննարկել են ՀՀ-ում տիրող ներքաղաքական վիճակը, ինչպես նաև Տավուշի մարզում տեղի ունեցած միջադեպերը: Նրանք նկատել են, որ մինչև իրենք էլ մեծ «ռազմախով» չխառնվեն ազգի ու մասնավորապես Արցախի գործերի մեջ, բան դուրս չի գա:

Իսկ որ ամենաուշագրավն է եղել այդ զրույցի ընթացքում, ՌՀՄ նախագահ Արա Աբրահամյանը ազգի գործերը կարգավորելուց հետո անցել է բիզնես ոլորտին վերաբերող խնդիրներին: ՌՀՄ նախագահը ասել է, որ մտադիր է Մոսկվայում կառուցել «Արարատ Հայաթի» նմանությամբ մի շատ ավելի մեծ շինություն, որն իր գեղեցկությամբ անգամ մեր հակառակորդների աչքը կծակի:

Ժամանակին Արա Աբրահամյանը մեծ ճիգեր էր գործադրում նախկին ԱԱԾ պետ Կառլոս Պետրոսյանից չնչին գումարներով գնելու «Արարատ Հայաթում» ունեցած իր մասնաբաժինը, սակայն այդ փորձերը ապարդյուն են անցել: