Համայնքներին պետական բյուջեով արդեն իսկ նախատեսված սուբվենցիաներից բացի այլ սուբվենցիաներ տրամադրելու նպատակով Արմավիրի, Գեղարքունիքի, Լոռու, Կոտայքի, Շիրակի, Վայոց ձորի և Տավուշի մարզպետարաններին կհատկացվի 1 մլրդ 449 մլն դրամ։ Որոշումն ընդունվեց Կառավարության մարտի 23-ի նիստում։ 

Տարածքային կառավարման և ենթակառուցվածքների նախարար Գնել Սանոսյանը հայտնեց, որ խոսքը 12 համայնքներում իրականացված 14 սուբվենցիոն ծրագրերը ֆինանսավորման մասին է։ Ծրագրերը հիմնականում ավարտվել են և անհրաժեշտ է Կառավարության ֆինանսավորումը։

ՏԿԵ նախարարը ներկայացրեց, թե որ մարզում քանի ծրագիր է իրականացվել․

• Արարատի մարզ՝ 2 ծրագիր, 80 մլն դրամ, 
• Արմավիրի մարզ՝ 1 ծրագիր, 8,7 մլն դրամ,
• Գեղարքունիքի մարզ՝ 2 ծրագիր, 50 մլն դրամ,
• Լոռու մարզ՝ 2 ծրագիր, 57 մլն դրամ,
• Կոտայքի մարզ՝ 1 ծրագիր, 5,6 մլն դրամ,
• Վայոց ձորի մարզ՝ 1 ծրագիր, 854 հազ. դրամ,
• Տավուշի մարզ՝ 3 ծրագիր, 179 մլն դրամ։
• Շիրակի մարզ՝ 2 ծրագիր, 913 մլն դրամ։

«Որոշումն ընդունելով՝ կստացվի, որ շուրջ 80 ծրագրի համար Կառավարությունն այս տարի ֆինանսավորել է իր մասնաբաժինը, և այդ ամբողջ գումարը կկազմի 5 մլրդ 200 մլն դրամից ավելի»,- հայտնեց նախարարը։