Փետրվարին 286 մլն 711 հազ. դրամ վերադարձնում ենք կենսաթոշակառուներին. վարչապետ
Բավական լավ տեմպ ունենք Հայաստանում կանխիկի շրջանառությունը կրճատելու առումով։ Այս մասին Կառավարության մարտի 30-ի նիստին ասաց վարչապետ Նիկոլ Փաշինյանը։
Անդրադառնալով կենսաթոշակառուների անկանխիկ առևտրին՝ Փաշինյանն ընդգծեց՝ «աճի շատ տպավորիչ տեմպը շարունակվում է»։
Ըստ նրա՝ փետրվարին անկանխիկ եղանակով իրականացվել է 3,4 մլրդ դրամի առևտուր։
«2022-ին այս ցուցանիշն, ըստ էության, ձգում էր 0-ի, իսկ դեկտեմբերին և հունվարին 2,7 մլրդ դրամի շրջանակում էր, ինչը նշանակում է, որ շատ էական՝ 20-25%-ով աճի տեմպը շարունակում ենք պահել։ Այս առևտրի արդյունքում փետրվարի համար 286 մլն 711 հազ. դրամ վերադարձնում ենք կենսաթոշակառուներին։
Կենտրոնական բանկի տվյալների համաձայն՝ 2022-ի հուլիսին կամ հունիսի վերջի դրությամբ ՀՀ-ում կար շուրջ 22 000 ակտիվ ՊՈՍ տերմինալ, այսօրվա դրությամբ ՊՈՍ տերմինալների թիվը եռապատկվել է»,- ասաց Փաշինյանը՝ նշելով, որ այսպիսով ստվերը կրճատվում է։
ԿԲ նախագահ Մարտին Գալստյանն էլ նշեց, որ 2022-ի հունիսի 1-ի դրությամբ կենսաթոշակառուների միայն 1.8%-ն էր անկանխիկ վճարում, փետրվարի 1-ի դրությամբ՝ 17,5%-ը։
Անդրադառնալով տնտեսական ակտիվության ցուցանիշին՝ վարչապետը նշեց, որ առևտրի շրջանառությունը մոտ 18%-ով աճել է։
«Փետրվարին տնտեսական ակտիվության ցուցանիշը կազմել է 11,3%, արտաքին առևտրաշրջանառությունն աճել է 79,5%-ով, արտահանումը՝ 2,1 անգամ, ներմուծումը՝ 163%-ով, շինարարությունը՝ 13.9%, ծառայությունները՝ 21%-ով։ Փետրվարին նախորդ տարվա փետրվարի համեմատ արդյունաբերությունն աճել է 0.7%-ով։
Խնդիր ունենք արդյունաբերության ոլորտում ավելի մեծ և ավելի տեսանելի աճ արձանագրել։ Խնդիրը միայն հանքարդյունաբերության մեջ չէ, ռազմավարական նպատակ ենք ձևակերպել մեր տնտեսության բարդության աստիճանը մեծացնել և ավելացնել։
Հունվար-փետրվար ամիսների ցուցանիշներով տնտեսական ակտիվության ցուցանիշը 10.9% է։ Արդեն երկու ամիս ավելի քան 10% ակտիվության ցուցնիշ ենք արձանագրում»,- եզրափակեց Փաշինյանը։
Մեկնաբանել