«ՉԻ» տեղեկությունների համաձայն՝ տեւական ժամանակ է, ինչ խուլ հակասությունների մեջ են «Զանգեզուրի պղնձամոլիբդենային կոմբինատ» ՓԲԸ-ում 12,5-ական բաժնետոմսեր ունեցող «Զանգեզուր Մայնինգ» եւ «Արմենիա Մոլիբդեն Փրոդաքշըն» ընկերությունները: Նշված ընկերությունների «փայատերեր» Կարեն Կարապետյանի եւ Մաքսիմ Հակոբյանի միջեւ տարաձայնություններ են առաջացել հիմնականում համաշխարհային ֆինանսատնտեսական ճգնաժամի ֆոնի վրա՝ կապված մոլիբդենի արտադրության ու վաճառքի ցուցանիշների հետ:

Ասում են՝ երկու գործարարների շահերը բախվել են նաեւ արատահանման ծավալների շուրջ, որոնց արտադրանքի 80 տոկոսը արատահանվում է Եվրոպա, իսկ 20 տոկոսը՝ Ասիա: Ի դեպ, «Արմենիա Փրոդաքշըն»-ի տնօրեն Կարեն Կարապետյանը, որը նախկինում իրավապահ համակարգում է աշխատել շատ ջերմ հարաբերությունների մեջ է ՀՀ վարչապետ Տիգրան Սարգսյանի հետ: Եվ պատահական չէ, որ այս կազմակերպությունում վարչապետի ազգականներից մեկը շատ լուրջ պաշտոն է զբաղեցնում:

Դե իսկ ահա Մաքսիմ Հակոբյանի ունեցած կապերի մասին խոսելն անգամ ավելորդ է, քանի որ հարց է, թե նա ում հետ «լավ» չէ, բացի սյունյաց մարզպետ Սուրեն Խաչատրյանից: Երկու գործարարների միջեւ ստեղծված լարվածության շուրջ «Չի»-ն կարողացել է մեկնաբանություն ստանալ միայն Կարեն Կարապետյանից, որն էլ ասել է. «Վայ, չէ, չէ, ի՞նչ տարաձայնություն, ի՞նչ բան, տենց բան չկա: Ախր, էդ որտեղի՞ց են տենց բաները գալիս ձեզ հասնում, տենց բաներ մի արեք, մի գրեք, մեզ խայտառակ մի արեք»: