Թուրքիայում Հայաստանի դեսպանության բացում մոտ հեռանկարում չկա օրակարգում, բայց երկու երկրներն աշխատում են սահմանային անցակետերի բացման ուղղությամբ։ Այդ մասին երկուշաբթի օրը՝ ապրիլի 10-ին, A Haber հեռուստաընկերության եթերում հայտարարել է Թուրքիայի արտաքին գործերի նախարար Մևլյութ Չավուշօղլուն։ 

«Մոտ ապագայում կարող է տեղի չունենալ (Հայաստանի դեսպանության բացում-խմբ.), որովհետև սկզբում մենք պետք է այլ քայլեր անենք։ Մենք բացել ենք մեր օդային տարածքը Հայաստանի համար, իրականացվում են բեռնային փոխադրումներ, մեկնարկել է փոխադարձ ավիահաղորդակցությունը, մեր տարածքով հայ ավիափոխադրողները կարող են թռչել երրորդ երկրներ։ Բայց որպեսզի բացվեն ցամաքային անցակետերը, քաղաքական նախապայմանների հետ միասին պետք է պատրաստել ճանապարհները, վերականգնել կամուրջը։ Կամրջի շինարարության մասով մենք ունենք պայմանավորվածություններ»,- ասել է Չավուշօղլուն։

Թուրք նախարարը, սակայն, նշել է, որ ցամաքային անցակետը հասանելի կլինի դիվանագիտական անձնագիր ունեցող անձանց և երրորդ երկրների քաղաքացիների համար։

Չավուշօղլուի խոսքով՝ Հայաստանի հետ սահմանին կա «պատմական Մետաքսի ճանապարհի 900-ամյա կամուրջ (ի նկատի ունի Անիի կամուրջը- խմբ.), որը և պետք է վերականգնել ու ամրացնել փոխադրումների ապահովման համար»։ Ըն դորում, Թուրքիայի ԱԳՆ ղեկավարն ընդգծել է, որ Հայաստանի հետ հարաբերությունների կարգավորման յուրաքանչյուր քայլ արվում է «Ադրբեջանի հետ խորհրդակցություններից հետո»։

Չավուշօղլուն հայտնել է, որ Ադրբեջանի և Հայաստանի միջև մշտական խաղաղության ձեռքբերման հեռանկարների շրջանակներում Թուրքիան կողմերին աջակցություն կցուցաբերի, ինչպես նաև կօգնի տարածաշրջանում ենթակառուցվածքային ու բեռնափոխադրումային նախագծերի իրականացմանը։

Հիշեցնենք, որ ապրիլի 6-ին ՀՀ պետական եկամուտների կոմիտեի նախագահ Ռուստամ Բադասյանը հայտնել էր, որ Թուրքիայի հետ սահմանին մեկնարկել է «Մարգարա» անցակետի վերագործարկման նախապատրաստական աշխատանքները։

«Մենք հիմա այլ պետական մարմինների հետ նախապատրաստվում ենք, որպեսզի հնարավորինս արագ, եթե վերջնական որոշումը կայացվի, սահմանային կետը գործի։ Այսինքն` իրականացնում ենք նախապատրաստական աշխատանքներ մաքսային ընթացակարգերը սահուն կիրառելու համար»,–ասել էր Բադասյանը։

Լուսանկարը՝ Anadolu գործակալության