Եվրամիության արտաքին գործողությունների եվրոպական ծառայության խոսնակը հայ-ադրբեջանական սահմանի վերջին միջադեպերի վերաբերյալ հայտարարություն է արել, որում ասվում է հետևյալը․

«Եվրոպական միությունն ափսոսանք է հայտնում զինված բախումների կապակցությամբ, որոնց հետևանքով հայ-ադրբեջանական սահմանի Տեղ բնակավայրի հատվածում երեկ եղել են զոհեր, վիրավորներ հայ և ադրբեջանցի զինծառայողների շրջանում։

Այս միջադեպը ևս մեկ անգամ ընդգծում է, որ սահմանազատված սահմանագծի բացակայության պայմաններում պետք է հարգել 1991թվականի գիծը, կողմերի ուժերը [պետք է] հետ քաշվեն այդ գծից անվտանգ հեռավորության վրա՝ կանխելու նման միջադեպերը:

Նախկինում ստանձնած, այդ թվում՝ 2022 թվականի հոկտեմբերին Պրահայում ձեռք բերված՝ 1991 թվականի Ալմաթիի հռչակագրի համաձայն տարածքային ամբողջականության փոխադարձ ճանաչման վերաբերյալ  պարտավորությունները պետք է հարգվեն: Եվրոպական միությունը նաև հորդորում է ակտիվացնել սահմանների սահմանազատման շուրջ բանակցությունները և շարունակում է պատրաստակամություն ցուցաբերել աջակցելու այս գործընթացին։

Մենք վերստին հնչեցնում ենք զսպվածության և բոլոր վեճերը խաղաղ ճանապարհով լուծելու մեր կոչը։ ԵՄ-ը շարունակում է աջակցել այդ ջանքերին, այդ թվում՝ ամենաբարձր մակարդակով, ինչպես նաև Հայաստանում ԵՄ առաքելության ներկայության միջոցով»։

Հիշեցնենք՝ Ադրբեջանի զինված ուժերի գործողությունների հետևանքով զոհվել էր ՀՀ ԶՈՒ 4 զինծառայող, 6-ը՝ վիրավորվել։ Ըստտ ՀՀ պաշտպանության նախարարության՝ ադրբեջանական կողմն ունեցել է մեծաթիվ զոհեր և վիրավորներ: 

Լուսանկարը՝ Shutterstock-ից