Ապրիլի 13-ին հայ կինոյի 100 ամյակի միջոցառումների շրջանակում Կինոյի տանը բացվել է նամականիշերի ցուցահանդես։ 

Նամականիշերը նվիրված են հայկական կինոյին, Հայաստանի և սփյուռքի կինոգործիչներին։ Դրանք երկար տարիներ խնամքով հավաքել է քիմիկոս, գիտությունների թեկնածու, դոցենտ Ժան Գյուլբենկյանը։

Դրոշմանիշերով նա տարվել է դեռ պատանի հասակում, դրանք հավաքելուն օգնել են ծնողները։ Հաճախել է կինոդիտումների և մի օր էլ զգացել է, որ սիրում է կինոն։ «Այդ ժամանակ ես արդեն հավաքում էի նամականիշեր, իսկ կինոյի հետ կապ ունեցող նամականիշեր շատ չկային։ Ամեն դեպքում, ես չէի կարող հավաքել դրոշմանիշեր մի բանի մասին, ինչից գաղափար չունեի», - ասում է հավաքածուի հեղինակը։ Ժան Գյուլբենկյանը պատմում է, որ մի ժամանակ իրենց ամբողջ տունը ողողված էր հայ և համաշխարհային կինոգրականությամբ՝ ամսագրեր, գրքեր, թերթեր։  «Այստեղ ներկայացված է միայն հայկական և սփյուռքի կինոգործիչների, կինոյի մասին դրոշմանիշեր, սա իմ ամբողջ հավաքածուի մեկ տասներորդ մասն է», - ասում է Գյուլբենկյանը։

Նրա դրոշմանիշերի մի մեծ հատված էլ վերաբերում է համաշխարհային կինոյին։ Ըստ Գյուլբենկյանի՝ կինոգործիչները ոչ միայն ռեժիսորներն ու դերասաններն են, այլև այն բոլոր մարդիկ, որոնք մասնակցել են կինոյի ստեղծման պատմությանը։ Հավաքածուի հեղինակը արդեն չի հիշում, թե դրոշմանիշերից շատերը ինչպես է ձեռք բերել, բայց կան դրոշմանիշներ, որոնք հատուկ պատմություն ունեն։ Փարաջանովի պատկերով դրոշմանիշների կողքին տեղադրված է նաև ռեժիսորի՝ կալանավայրից կնոջը և որդուն գրված նամակը։ Այն ձեռք բերելու համար Գյուլբենկյանը Փարաջանովի տուն-թանգարանի նախկին տնօրեն Զավեն Սարգսյանին տվել է 3 ամսագիր, որոնցում եղել են ռեժիսորին վերաբերող բացառիկ հոդվածներ։ 

Նամականիշերը հավաքելու համար Գյուլբենկյանից պահանջվել է գրեթե կես դար։ 

Ցուցահանդեսի բացմանը ներկա էր նաև Կինոգործիչների միության նախագահ Հարություն Խաչատրյանը։ «Ձեր հավաքածուն հույս է տալիս մտածելու, որ կինոն և կինոգործիչները մոռացված չեն, սա ահռելի աշխատանք է, որը չի կարող չգնահատվել», - դիմելով Գյուլբենկյանին՝ ասել է Հարություն Խաչատրյանը։

Ժան Գյուլբենկյանը և Հարություն Խաչատրյանը

Մշակույթի վաստակավոր գործիչ, կինոգետ Ռոբերտ Մաթոսյանն էլ հիշեցրել է քիմիկոսի     հոր՝ կենսաբան Խորեն Գյուլբենկյանի ասածը․ «Ժանի հայրը տեսնում է, որ քիմիկոս տղան օր ու գիշեր դրոշմանիշ է հավաքում, ասում է՝ տղա ջան, դու որ այսպես քո մասնագիտությամբ զբաղվես, Նոբելյան մրցանակ կստանաս»։ 

Լուսանկարները՝ Կինոգործիչների միության

Աննա Հարությունյան, Հետք Մեդիա Գործարան

Դասախոս՝ Մարիամ Բարսեղյան