Առաջիկա մի քանի ամիսներին բնակչության թվաքանակի ցուցանիշով Հնդկաստանը կշրջանցի Չինաստանին և կդառնա աշխարհում ամենամեծ բնակչություն ունեցող երկիրը։

ՄԱԿ-ի կանխատեսումներով, որը հրապարակվել է ապրիլի 19-ին, Հնդկաստանի բնակչությունը 2023 թվականի կեսերին կհասնի 1 միլիարդ 428 միլիոնի, ինչը մոտ 3 միլիոնով կլինի ավելին, քան տվյալ պահին Չինաստանի բնակչությունը։

Ինչպես նշում է AFP-ն, երկար ժամանակ Չինաստանը համարվում էր բնակչության թվաքանակով աշխարհում ամենամեծ երկիրը, սակայն 2022 թվականին, 1960 թվականից ի վեր առաջին անգամ, այդ երկրի բնակչությունը սկսեց կրճատվել, իսկ Հնդկաստանի բնակչությունը շարունակում էր աճել։ 

ՄԱԿ-ը համարվում է աշխարհի երկրների բնակչության թվաքանակի վերաբերյալ տվյալների ամենահեղինակավոր աղբյուրը։ Ժողովրդագրությունն ուսումնասիրող մյուս կազմակերպությունները, օրինակ, World Population Review-ն, դեռ 2023 թվականի հունվարին հայտարարել էր, որ Հնդկաստանը բնակչության թվաքանակով արդեն իսկ շրջանցել է Չինաստանին։

2022 թվականի նոյեմբերին, ՄԱԿ-ի գնահատմամբ, Երկրագնդի բնակչությունը հասել է մինչև 8 միլիարդի։ Կազմակերպության հաշվարկներով՝ Երկիր մոլորակի բնակչությունը մեկ միլիարդով ավելանալու համար պահանջվեց 12 տարի, սական 9 միլիարդի շեմին հասնելու համար, ըստ ՄԱԿ-ի կանխատեսումների, կպահանջվի մոտ 15 տարի, այսինքն մինչև 2037 թվականը, ինչը վկայում է, ընդհանուր առմամբ, երկրագնդի բնակչության թվաքանակի աճի տեմպերի դանդաղելու մասին։

Լուսանկարը՝ Anindito Mukherjee/Getty Images, FILE