Կառավարությունն առաջարկում է Քննչական կոմիտեի քննիչներին վճարել ամսական հավելում՝ պաշտոնային դրույքաչափի 92 %-ի չափով: Որոշման նախագիծն ընդգրկված է Կառավարության ապրիլի 21-ի նիստի օրակարգում:

Նախագծի ընդունման արդյունքում 2023թ. հունիս-դեկտեմբեր ամիսների համար Քննչական կոմիտեի ինքնավար պաշտոն զբաղեցնող 975 անձանց ամսական դրույքաչափի 92 %-ի չափով հավելում նախատեսելու դեպքում, նախնական հաշվարկով, անհրաժեշտ է 3 մլրդ 120 մլն 549,792 դրամ։

Ըստ որոշման նախագծի հիմնավորման՝ Քննչական կոմիտեի քննիչներին վճարվող հավելումների չափը որոշելիս հիմք է ընդունվել առանձնակի ռիսկային, բարդություններով պայմանավորված և մասնագիտացում պահանջող պաշտոններ զբաղեցնող անձանց տրամադրվող հավելումների միասնական, չտարբերակված մոտեցում սահմանելու անհրաժեշտությունը: Իսկ առաջարկվող լուծումը և՛ բխում է Քննչական կոմիտեի քննիչի աշխատանքի առանձնակի ռիսկային բնույթից, և՛ բացառում է համակարգային իրավակարգավորումներում անհամաչափությունները։

Հաշվի է առնվել նաև Հակակոռուպցիոն կոմիտեում ինքնավար պաշտոն զբաղեցնող անձանց 2023թ. հունվարի 1-ից, ինչպես նաև Դատախազության դատախազներին 2023թ. ապրիլի 1-ից պաշտոնային դրույքաչափի 92 %-ի չափով հավելումների փաստը:

«Հակակոռուպցիոն կոմիտեում, Դատախազությունում, ինչպես նաև Քննչական կոմիտեում ինքնավար պաշտոն զբաղեցնող անձանց աշխատանքում որևէ տարբերակումը բացառելու նպատակով, Քննչական կոմիտեն մշակել է սույն նախագիծը, քանի որ Դատախազության և Քննչական կոմիտեի աշխատանքը հանդիսանում է ուղիղ փոխկապակցված, և մի մարմնի աշխատողների սոցիալական վիճակի բարձրացումը խզում կառաջացնի այդ շղթայում:  

Եթե դատախազի աշխատանքն ենթադրում է որոշակի ռիսկայնություն, ապա դա ուղիղ փոխկապակցված է վերջինիս կողմից դատավարական ղեկավարում իրականացնող՝ Քննչական կոմիտեի քննիչների աշխատանքով, քանի որ սկզբնական օղակը հանդիսանում է նախաքննություն իրականացնող քննիչը, որպիսզի պայմաններում՝ ռիսկայնության վերաբերյալ պնդումը պետք է լինի շղթայական և փոխկապակցված»,- նշված է որոշման նախագծի հիմնավորման մեջ:

Կառավարության օրենսդրական նախաձեռնությունը կհամարվի անհետաձգելի և սահմանված կարգով կներկայացվի Ազգային ժողովին: