![](/static/articles/15/53/37/l-bo3G69TeQB.jpg)
Մեծ Բրիտանիայի փոխվարչապետ Դոմինիկ Ռաաբը հրաժարական է տվել. պատճառը բուլինգի մեղադրանքն է
Բրիտանական կառավարության փոխվարչապետ և Մեծ Բրիտանիայի արդարադատության նախարար Դոմինիկ Ռաաբը ապրիլի 21-ին հրաժարական է տվել պետական աշխատողներին բուլինգի ենթարկելու մեղադրանքների պատճառով։ Հրաժարականի վերաբերյալ նա գրառում է արել թվիթերյան իր միկրոբլոգում՝ տեղադրելով նաև դիմումը։
My resignation statement.👇 pic.twitter.com/DLjBfChlFq
— Dominic Raab (@DominicRaab) April 21, 2023
Քաղաքական գործիչն այս որոշումն ընդունել է այն բանից հետո, երբ բրիտանացի հայտնի իրավաբան Ադամ Թոլիի անկախ հետաքննությունը իրավաչափ է համարել կադրային պաշտոնյաների երկու պնդում, որոնք նախարարին մեղադրում էին բուլինգի մեջ։ Ընդհանուր առմամբ, Ռաաբի հասցեին կա 8 բողոք, որոնք վերաբերում են առնվազն 24 մարդու, գրում է BBC-ն։
Իրավաբանի զեկույցը դեռևս չի հրապարակվել, սակայն ապրիլի 20-ին ուղարկվել է Մեծ Բրիտանիայի վարչապետ Ռիշի Սունակին։ Դաունինգ սթրիթ 10-ում նշել են, որ փոխվարչապետը հրաժարականի որոշումն ընդունել է ինքնուրույն՝ չսպասելով կառավարության ղեկավարի որոշման կայացմանը։
Այդուհանդերձ Ռաաբը նշել է միայն երկու մեղադրանքի իրավաչափությունը և հավելել, որ դրանք վտանգավոր նախադեպ են ստեղծում կառավարության գործունեության համար։ Նրա կարծիքով՝ դա պետական ծառայողներին թույլ է տալիս չընդունել իրենց հասցեին քննադատությունը և բուլինգի մեղադրանքով ազատվել իրենց համար անցանկալի նախարարներից։
Լանքասթերի դքսության կանցլեր Օլիվեր Դաուդենը դարձել է Մեծ Բրիտանիայի նոր փոխվարչապետը, իսկ Ալեքս Չոքը, որն զբաղեցնում էր պաշտպանության փոխնախարարի պաշտոնը, ստացել է արդարադատության նախարարի պաշտոնը։
Դոմինիկ Ռաաբը վերջին տարիներին համարվում էր բրիտանական պահպանողական կառավարության անբաժանելի մասը։ Նախկին վարչապետ Թերեզա Մեյի օրոք նա զբաղեցնում էր Brexit-ի հարցերով նախարարի, իսկ Բորիս Ջոնսոնի օրոք՝ արտաքին գործերի նախարարի պաշտոնը։
Լուսանկարը՝ Leon Neal/Getty Images News/Getty Images
Մեկնաբանել