Արցախի պետական նախարար Գուրգեն Ներսիսյանը հայտնում է, որ արդեն երրորդ օրն է՝ Արցախում կտրոնային համակարգով նախատեսված ապրանքների զգալի մասը ձեռք է բերվում և մանրածախ վաճառքի կետերին իրացվում է պետության կողմից և կազմակերպմամբ:

«Այդ ոլորտում ձևավորված մոտեցումների վերանայման արդյունքներն արդեն դրական են գնահատվում մեր քաղաքացիների կողմից, բնակչությանը իրացվում է բարձր որակի ապրանք՝ ողջամիտ գներով:

Հաշվի առնելով, որ պետական և մասնավոր հատվածում ներգրավված մեր քաղաքացիները աշխատանքային զբաղվածության պատճառով մեծ դժվարությամբ էին կարողանում օգտվել կտրոնային համակարգով նախատեսված ապրանքներից, երեկվանից հիշյալ անձանց անհրաժեշտ մթերքներն իրացվում են աշխատավայրերում՝ շրջիկ մեքենաների միջոցով կամ դրանց մոտ գտնվող խանութներում, գործընթացը կրելու է շարունակական բնույթ»,- ասված է պետնախարարի ֆեյսբուքյան գրառման մեջ: