Ազգային ժողովում այսօր Կառավարության անդամները պատասխանում են պատգամավորների հարցերին: Հարցեր տալու համար հերթագրվել է 30 պատգամավոր: Ընդդիմադիր խմբակցությունների պատգամավորները ևս մասնակցում են նիստին:

Պատգամավոր Վիլեն Գաբրիելյանը, դիմելով վարչապետ Նիկոլ Փաշինյանին, ասաց, որ հարցը տալիս է ոչ միայն որպես պատգամավոր, այլև Բաքվում ծնված մարդ, որի ընտանիքը կյանքից զրկվելու սպառալիքով բռնագաղթել է: Ըստ պատգամավորների՝ փախստականների իրավունքների հարցերով զբաղվող մի քանի հասարակական կազմակերպություն օրեր առաջ Երևանում համաժողով է կազմակերպել՝ «Ադրբեջանական ագրեսիայի հին և նոր փախստականները. անցյալը ներկան և ապագան» խորագրով: Ընդունվել է հռչակագիր, որը բարձրաձայնում է հարյուր հազարավոր հայ փախստականների իրավուքների մասին: Արձանագրվել է, որ նրանք իրավունք ունեն վերադառնալ իրենց հայրենիք կամ հայրենիքի այն հատվածը, որտեղ հնարավոր է ապահովել նրանց  ֆիզիկական անվտանգությունը, քաղաքական և քաղաքացիական իրավունքները:

Վիլեն Գաբրիելյանը հետաքրքրվեց Կառավարության դիրքորոշման մասին՝ բարձրաձայնված խնդիրների մասին, ինչպես նաև Հայաստանը՝ որպես պետություն, մարդկանց ոտնահարված իրավունքների մասով նախատեսում է որևէ ինստիտուցիոնալ մոտեցում ցուցաբերել, որպեսզի այդ հարցը հասնի միջազգային ատյաններ:

Վարչապետ Նիկոլ Փաշինյանը, պատասխանելով հարցին, նշեց, որ ծանոթացել է հռչակագրի բովանդակությանը և բարձրացված հարցերի ճնշող մեծամասնությունը լեգիտիմ է:

Նիկոլ Փաշինյանը նշեց, որ 2019թ․ Կառավարությունը «Ադրբեջանից փախստական դարձածների ծրագիր» է իրականացրել՝ բնակարաններով ապահովելու նպատակով, որը շարունակվում է:

«Գուցե ճիշտ կլինի, որ առաջիկայում աշխատանքային հանդիպում կազմակերպենք և ավելի մանրամասն քննարկենք հարցը: Այս պահին կարող եմ ասել, որ բարձրացված հարցերը լեգիտիմ են: Այո՛, մենք գիտենք, որ այդ պրոբլեմը կա: Հայաստանում կան Բաքվի ջարդերի, Սումգայիթի ջարդերի հետևանքով փախստական դարձածներ, Ադրբեջանի տարածքում տեղի ունեցած այլ գործողությունների հետևանքով փախստական դարձածներ, Լեռնային Ղարաբաղից և շրջակա տարածքներից փախստականներ, որն արձանագրված է 2020թ. նոյեմբերի 9-ի եռակողմ հայտարարության մեջ»,-ասաց Նիկոլ Փաշինյանը:

Փաշինյանն ասաց, որ Լեռնային Ղարաբաղի հայաբնակ գյուղերն այժմ բնակեցվում են ադրբեջանցիներով, և հայերի ունեզրկման գործընթաց է տեղի ունենում: