Թուրքիայի արտաքին գործերի նախարար Մևլյութ Չավուշօղլուն հայտարարել է, որ մայիսի 10-ին կմենկնի Մոսկվա՝ Ռուսաստանի ԱԳ նախարար Սերգեյ Լավրովի հետ հանդիպման ու Սիրիայի հարցով քառակողմ բանակցություններին մասնակցելու համար։

«Մենք Մոսկվայից ստացել ենք պաշտոնական հաստատում։ Մայիսի 10-ին մենք կմեկնենք Մոսկվա։ Առավոտյան ես հնարավորություն կունենամ բանակցություններ վարել Լավրովի հետ, իսկ դրանից հետո մենք կմասնակցենք նախարարական հանդիպմանը (Անկարայի և Դամասկոսի միջև հարաբերությունների կարգավորման հարցերով ՌԴ-Իրան-Սիրիա-Թուրքիա ձևաչափ-խմբ)»,- թուրքական 24TV-ին տված հարցազրույցում հայտարարել է Չավուշօղլուն։

Անկարայի և Դամասկոսի միջև հարաբերությունների կարգավորման գործընթացը մեկնարկել է 2022 թվականի դեկտեմբերի 28-ին Մոսկվայում, երբ խորհրդակցություններ էին տեղի ունեցել Ռուսաստանի, Սիրիայի և Թուրքիայի պաշտպանական գերատեսչությունների ղեկավարների միջև։ Հանդիպման ընթացքում պայմանավորվածություն էր ձեռքբերվել եռակողմ համատեղ հանձնաժողովի ստեղծման վերաբերյալ։

Այդ խորհրդակցություններից հետո պետք է կայանա ԱԳ նախարարների մակարդակով հանդիպումը, իսկ օրակարգում պետք է լինի Թուրքիայի և Սիրիայի առաջնորդներ Ռեջեփ Թայիփ Էրդողանի ու Բաշար Ասադի միջև բանակցությունների անցկացումը։ Ավելի ուշ, հայտնի դարձավ, որ այդ խորհրդակցություններին կմասնակցի նաև իրանական կողմը։

Լուսանկարը՝ Anadolu գործակալության