Ռուսական զորքերը օդային հարձակում են իրականացրել Կիևի վրա. Ուկրաինան հայտարարել է 15 թիրախի խոցման մասին
Ուկրաինայի հակաօդային պաշտպանության ուժերը Կիևի երկնքում խոցել են 15 օդային թիրախ։ Այդ մասին հայտնել է Կիևի քաղաքային զինվորական վարչակազմի մամուլի ծառայությունը։
«Օդային թիրախները վնասներ չեն հասցրել տալ։ Նախնական տվյալներով, բեկորների անկման հետևանքով, զոհեր ու լուրջ փլուզումներ չկան»,- ասված է հաղորդագրության մեջ։
Կիևի իշխանությունների տվյալներով՝ ուկրաինական մայրաքաղաքը Կասպից ծովի ավազանից հարձակման է ենթարկվել ռուսական Ту-95МС չորս ռմբակոծիչների կողմից։ Սա մայիսի սկզբից ի վեր Կիևի ուղղությամբ հինգերորդ օդային հարձակումն է։
«Արձակված թևավոր հրթիռները, ամենայն հավանականությամբ՝ բոլորը Х-101 (Х-555) տիպի, չեն հասել իրենց թիրախներին»,- հայտարարել է վարչակազմի ղեկավար Սերգեյ Պոպկոն։
Կիևի քաղաքապետ Վիտալի Կլիչկոն հայտնել է, որ խոցված հրթիռի բեկորն ընկել է մայրաքաղաքի Գոլոսեևի շրջանի մասնավոր տներից մեկի բակ, որի հետևանքով հրդեհ է առաջացել։ «Այրվող բեկորը մարել են։ Տուժածներ ու վնասվածքներ չկան»,- գրել է նա։
Ուկրաինայի զինված ուժերի գլխավոր հրամանատար Վալերի Զալուժնու խոսքով՝ ռուսական զորքերը գիշերը ծովային և օդային բազավորման թևավոր հրթիռներով հարձակվել են Ուկրաինայի վրա։ ՀՕՊ-ը ոչնչացրել է 25 թիրախից 23-ը։
Հիշեցնենք, որ մայիսի 8-ի գիշերը ռուսական զորքերը, իրանական արտադրության Shahed-136/131 կամիկաձե դրոնով, հարձակվել էին Կիևի ու Օդեսայի մարզերի վրա։ Կիևի վրա հարձակված բոլոր 35 անօդաչուները խոցվել էին հակաօդային պաշտպանության միջոցների կողմից։ Հարձակումների հետևանքով տուժել էր Կիևի առնվազն 5 բնակիչ։
Լուսանկարը՝ Genya Savilov/AFP/Getty Images
Մեկնաբանել