Սոթքում լարվածությունը թուլացել է, այս պահին բնակավայրում կրակոցների ձայներ չեն լսվում։ Այս մասին «Հետք»-ի հետ զրույցում հայտնեց Վարդենիս խոշորացված համայնքի ղեկավարի մամուլի քարտուղար Էդգար Պետրոսյանը։

Հիշեցնենք, որ այսօր` առավոտյան 06։00-ին, Ադրբեջանի ԶՈՒ ստորաբաժանումները հրետանային և ականանետային միջոցներից կրակ են բացել Սոթքի ուղղությամբ տեղակայված հայկական դիրքերի ուղղությամբ: Հայկական կողմն ունի 4 վիրավոր: Նրանց կյանքին վտանգ չի սպառնում:

«Բնակչությունը խուճապի մեջ չէ, առօրյա գործերով է զբաղված, աշխատանքային առօրյան շարունակվում է։ Ոչ մի արտառոց բան տեղ չի ունեցել, որ դպրոցում դասերը հետաձգվեն, աշխատանք չլինի»,- նշեց Պետրոսյանը։

Ըստ նրա՝ բնակավայրերի ուղղությամբ կրակոցներ չեն եղել։

Լուսանկարում՝ Սոթք բնակավայրը