Երևանի քաղաքապետ Տարոն Մարգարյանի Էրեբունի վարչական շրջան կատարած աշխատանքային շրջայցի շրջանակում քաղաքապետի մասնակցությամբ հանդիսավորությամբ բացվել է վարչական շրջանի Մանկական այգին: Հանգստի այս գոտու բարեկարգման խոստումը քաղաքապետ Տարոն Մարգարյանը բնակիչներին տվել էր դեռ նախորդ տարեվերջին այստեղ կազմակերպված ծառատունկի ժամանակ:

Ծրագրի համաձայն ամբողջությամբ բարեկարգվել ու կահավորվել է այգու ողջ` 1,5 հա տարածքը: Համալիր բարեկարգման շրջանակում հիմնովին փոխվել են նաև արտաքին լուսավորման և ոռոգման համակարգերը: Լայնածավալ աշխատանքներ են իրականացվել սիզամարգերի կանաչապատման ու ծաղկապատման ուղղությամբ, իսկ տեղադրված նոր նստարանները, զրուցարաններն ու խաղային նոր ատրակցիոններն էլ արդեն ծառայում են իրենց նպատակին:

«Մանկական այգին իրականում գտնվում էր շատ վատ վիճակում: Տասնյակ տարիներ անխնամ մնալու արդյունքում այգին չէր ծառայում իր բուն նպատակին: Քաղաքապետարանի  2012թ-ի շինբարեկարգման ծրագրով և մասնավոր հատվածի հետ համագործակցության արդյունքում մեզ հաջողվեց հիմնովին վերակառուցել այգու ողջ տարածքն ու հանձնել բնակիչներին»,- նշել է Տարոն Մարգարյանը:

Բնակիչներն իրենց գոհունակությունն ու շնորհակալությունն են հայտնել քաղաքապետին տասնյակ տարիներ անմխիթար վիճակում գտնվող այգին վերակառուցելու համար` ընդգծելով, որ բակերի, պուրակների ու այգիների բարեկարգումն իրապես առաջնահերթ խնդիր է իրենց համար: Քաղաքապետն էլ հորդորել է խնամքով վերաբերել ու պահպանել այն ամենը, ինչը ստեղծվում է բնակիչների հարմարավետությունն ապահովելու համար:

Շրջայցի շրջանակում Տարոն Մարգարյանը այցելել է նաև Արցախի 8 և Աթոյան անցուղի 18 շենքերի բակերում կառուցված նոր խաղահրապարակներ ու բնակիչների հետ միասին գնահատելով կատարված աշխատանքը, հանդիսավորությամբ բացել է նորաստեղծ հանգստի այդ գոտիները: Բնակիչներն իրենց գոհունակությունն ու շնորհակալությունն են հայտնել Երևանի քաղաքապետին մայրաքաղաքում օրեցօր ավելացող բարեկարգ ու հարմարավետ բակերի, մայրաքաղաքի արտաքին տեսքի նկատելի դրական փոփոխությունների համար: Տարոն Մարգարյանն էլ` ներկայացնելով Երևանի քաղաքապետարանի ծրագրերն ու իր մոտեցումները, վստահեցրել է, որ քաղաքապետարանի նախաձեռնած «Բարեկարգ Երևան» ծրագրի շրջանակում առաջիկա տարիների ընթացքում կբարեկարգվեն երևանյան բոլոր բակերը:

«Քաղաքապետարանի որդեգրած քաղաքականության արդյունքում այսօր քայլեր են տարվում մայրաքաղաքի բոլոր վարչական շրջաններում փոքր կենտրոններ ստեղծելու ուղղությամբ: Մենք մոտ ժամանակներս արդեն ականատես կլինենք նաև այդ հանգստի գոտիների բացմանը: Իսկ ընդհանրապես, որպես առաջնահերթություն, մեր խնդիրն է համաչափ զարգացում ապահովել ողջ Երևան քաղաքում»,-շեշտել է քաղաքապետը:

Աշխատանքային շրջայցի շրջանակում Տարոն Մարգարյանը հետևել է նաև Էրեբունի վարչական շրջանի Վարդաշեն թաղամասում արդեն ավարտին մոտեցող խաղահրապարակներից մեկի բարեկարգման ընթացքին, որից հետո այցելել է

Ջրաշենի առաջին և երրորդ փողոցներ` տեղում ծանոթանալու ճանապարհների հիմնանորոգման աշխատանքների ընթացքին: Շուրջ 400 մ երկարություն ունեցող գրունտային այս ճանապարհն առաջին անգամ է ասֆալտապատվելու: Քաղաքապետը հանձնարարել է լուրջ ուշադրություն դարձնել աշխատանքների կատարման ընթացքին:

Շրջայցից հետո քաղաքապետ Տարոն Մարգարյանը աշխատանքային խորհրդակցություն է անցկացրել վարչական շրջանի աշխատակազմի հետ ու հանձնարարել խստորեն հետևել քաղաքապետարանի ծրագրերով ընթացող աշխատանքների համակարգված կազմակերպմանն ու դրանք սահմանված ժամկետներում և որակով իրականացմանը: Այս մասին հայտնում է քաղաքապետարանի տեղեկատվության և հասարակայնության հետ կապերի վարչությունը: