Տեսանյութեր
Լուսանկարներ
Գագիկ Բեգլարյանին նախարարի պաշտոն տվեցին
ՀՀԿ-ն առողջապահության նախարարի պաշտոնում առաջադրել է Երեւանի պետական բժշկական համալսարանի ռեկտոր Դերենիկ Դումանյանին, տրանսպորտի նախարար կլինի Գագիկ Բեգլարյանը, իսկ աշխատանքի եւ սոցիալական հարցերի նախարարի պաշտոնը կստանձնի նույն նախարարության փոխնախարար Արտեմ Ասատրյանը: Այս մասին «Հետքին» տեղեկացրեց ՀՀԿ մամուլի խոսնակ, ԱԺ փոխնախագահ Էդուարդ Շարմազանովը:
ՀՀԿ-ն իր այսօրվա գործադիր մարմնի, այնուհետ խորհրդի նիստերում հստակեցրել է նոր կառավարության կազմը եւ որոշել, որ գործող բոլոր նախարարները շարունակելու են պաշտոնավարել: Առայժմ պարզ չէ միայն, թե ով է լինելու սպորտի եւ երիտասարդության հարցերի նախարարը: Շարմազանովը նշեց, որ նոր նախարարի անունը պարզ կլինի առաջիկայում, իսկ քաղաքաշինության նախարարի պորտֆելը տրվել է ՕԵԿ-ին եւ այդ կուսակցությունն էլ կառաջադրի իր նախարարին:
Քիչ առաջ ՕԵԿ-ը որոշել է, որ քաղաքաշինության նախարարի պաշտոնը կզբաղեցնի ԱԺ պատգամավոր Սամվել Թադեւոսյանը:
Մամուլում լուրեր էին շրջանառվում, որ ԱԺ նախկին նախագահ Սամվել Նիկոյանը գնալու է գործադիր մարմին եւ զբաղեցնելու է բնապահպանության նախարարի պաշտոնը: Գործադիր գնալու մասին լուրը անձամբ հաստատել էր նաեւ Սամվել Նիկոյանը, սակայն հարազատ կուսակցությունն այսօր որոշեց, որ նա բավարարվելու է շարքային պատգամավորի աթոռով:
Նշենք, որ այսօր ՀՀԿ կենտրոնական գրասենյակում նախագահ Սերժ Սարգսյանի գլխավորությամբ ժամը 20.00-ին տեղի ունեցավ ՀՀԿ գործադիր մարմնի նիստ, որին հաջորդեց խորհրդի նիստը: ՀՀԿ առաջնորդից բացի նիստին ներկա են եղել վարչապետ Տիգրան Սարգսյանը, ԱԺ նախագահ Հովիկ Աբրահամյանը, Երեւանի քաղաքապետ Տարոն Մարգարյանը եւ այլք:
Մեկնաբանություններ (5)
Մեկնաբանել