Եվրասիայի հարցերով Չինաստանի հատուկ բանագնաց Լի Հուեյն արդեն գտնվում է Ուկրաինայում։ Այդ մասին հայտնել է Bloomberg գործակալությունը։ 

Դեռևս հայտնի չէ, թե արդյոք չինացի դիվանագետը կհանդիպի Ուկրաինայի նախագահ Վլադիմիր Զելենսկուն, գրում է ամերիկյան պարբերականը։ Այդուհանդերձ, France 24-ը, հղում անելով իր աղբյուրին, նշում է, որ Զելենսկի-Հուեյ հանդիպում նախատեսված է օրվա երկրորդ կեսին։

Ինչպես փոխանցել է Agence France-Presse գործակալությունը, Լի Հուեյը մայիսի 16-17-ը այցով կգտնվի Կիևում։ Չինաստանի արտաքին գործերի նախարարության պաշտոնական ներկայացուցիչ Վան Վենբինը հայտնել է, որ չինացի դիվանագետը կայցելի նաև Ռուսաստան, Գերմանիա, Լեհաստան և Ֆրանսիա՝ ուկրաինական ճգնաժամի կարգավորման խորհրդակցություններին մասնակցելու համար։ 

Ինչպես նշել է չինացի դիվանագետը, Պեկինը մշտապես ուշադրությամբ հետևում է Ուկրաինայում առկա իրավիճակին և ձգտում ունենալ ակտիվ մասնակցություն՝ այդ երկրում ճգնաժամային իրավիճակի խաղաղ կարգավորման գործընթացում։

Լուսանկարը՝ Sputnik / Alexey Kudenko