Պատգամավոր Կնյազ Հասանովին են դիմել Աբովյան համայնքի ու հարակից գյուղերի մանրածախ առևտրով զբաղվողները՝ դժգոհելով «Վայլդբերիզ» ընկերությունից, որտեղից օնլայն պատվերներով էժան ապրանքներ են գնում:

Ըստ պատգամավորի՝ հայ վաճառականները հարկեր են վճարում, ինչը թանկացնում է իրենց ապրանքի գինը: Մինչդեռ, ըստ գյուղացիների, «Վայլդբերիզ» ընկերությունը հարկեր չի վճարում Հայաստանում:

Էկոնոմիկայի նախարար Վահան Քերոբյանը հերքեց պատգամավորի ունեցած տեղեկությունները՝ նշելով, որ «Վայլդբերիզը» Հայաստանի խոշոր հարկատուներից է: Առաջին եռամսյակի տվյալներով 20-րդ տեղում է:

Նախարարը նշեց, որ նախորդ տարի օրենսդրական փոփոխություններ են արել, որ էլեկտրոնային առևտրով զբաղվող միջազգային ընկերություններն ավելացված արժեքի հարկը վճարեն Հայաստանում, ինչը նախկինում չի եղել:

«Հիմա այդ առավելությունը չկա, հակառակ պատկերն ունենք: Այն ընկերությունները, որոնց մասին Դուք խոսում եք, Թուրքիայից և Չինաստանից ոչ այդքան թափանցիկ ճանապարհով, հարկային առումով, աշխատող ընկերություններ են»,- ասաց Վահան Քերոբյանը:

Կնյազ Հասանովն ասաց, որ տեղական աշխատողներն աշխատող են պահում, ընտանիքներ ունեն, հետևաբար պետք է ուշադրություն դարձնել:

Վահան Քերոբյանը, արձագանքելով պատգամավորին, ասաց, որ բիզնեսով զբաղվողը պետք է ունենա հաշվարկներ, գնահատի ռիսկերը: Եվ այն մարդիկ, ովքեր բիզնեսում իրենց տեղը չեն գտնում, կարող են աշխատել վարձու աշխատող: