![](/static/articles/15/66/88/l-xyL1z9s3Uv.jpg)
Գերմանիան փակում է Ռուսաստանի 5 գլխավոր հյուպատոսություններից 4-ը
Գերմանիայի կառավարությունը հայտարարել է իր երկրի տարածքում Ռուսաստանի 5 գլխավոր հյուպատոսություններից 4-ի աշխատանքների դադարեցման մասին։ Այդ մասին հայտնում է TACC գործակալությունը՝ հղում անելով Գերմանիայի ԱԳՆ-ին։ Ռուսաստանի գլխավոր հյուպատոսությունները գործում են Բոննում, Համբուրգում, Լայպցիգում, Մյունխենում և Մայնի Ֆրանկֆուրտում։ Գերմանական կողմը չի մանրամասնել, թե կոնկրետ որ գլխավոր հյուպատոսությունները կփակվեն։
«Ինչ վերաբերում է Գերմանիայում ռուսական ներկայությանը, որոշումն ընդունվել է փոխադարձության սկզբունքով, ինչպես կադրային, այնպես էլ կառուցվածքային առումով փոխադարձ ներկայության հավասարությունը պահպանելու նպատակով»,- հայտարարել է Գերմանիայի արտաքին քաղաքական գերատեսչության ներկայացուցիչ Քրիստոֆեր Բուրգերը։ Ըստ նրա՝ դիվանագիտական ներկայացուցչությունները կդադարեցնեն իրենց աշխատանքը մինչև տարվա վերջ։
Գերմանիայի ԱԳՆ-ում հավելել են, որ հյուպատոսությունների փակումը պատասխան է Ռուսաստանում գերմանական հաստատությունների աշխատակիցների թվի կրճատման որոշմանը (մինչև 350-ի)։
Գերմանիան մինչև այս տարվա նոյեմբեր ամիսը կփակի նաև Եկատերինբուրգում, Կալինինգրադում և Նովոսիբիրսկում իր հյուպատոսությունները։ «Դրանց աշխատանքն արդեն էականորեն սահմանափակվել է»,- հավելել է Բուրգերը։ Նա «քայլ դեպի սրում» է անվանել Ռուսաստանի որոշումը գերմանական հաստատությունների անձնակազմի կրճատման վերաբերյալ։
Այս տարվա ապրիլին Ռուսաստանի ԱԳՆ-ն հայտարարել էր Ռուսաստանում գերմանական դիվանագիտական ներկայացուցչությունների և Գերմանիայի մշակութային հաստատությունների աշխատակիցների թվի կրճատման մասին։ Բեռլինում հայտարարել էին, որ դրա պատճառով Գերմանիայի մի քանի հարյուր քաղաքացիներ ստիպված կլինեն լքել Ռուսաստանը։
Լուսանկարը՝ John Macdougall/AFP via Getty Images
Մեկնաբանել