«Հետքի» հարցերին պատասխանում է Հրազդանի քաղաքապետ Արամ Դանիելյանը

Ի՞նչ է սպասվում հրազդանցիներին, եթե հանքը շահագործվի:

Բնակիչներին ոչ մի բան չի սպասվում: Չինական կազմակերպության և «Նագին» կազմակերպության հետ կնքվել է պայմանագիր, դրանից հետո' հիմա արդեն հետազոտական աշխատանքներ են կատարում: Դեռ ոչ քաղաքապետարանը, ոչ չինական կազմակերպությունը ժողովրդի մեջ ոչ մի բան չենք տարածել: Ինչ-որ կազմակերպություններ կան, որոնք ժողովրդի մեջ ասեկոսեներ են գցում, թե' ձեր բնակարանները պետք է վաճառեք գնաք և այլն: Դեռ այդ ամեն ինչը հետազոտման փուլում է: Ոչ մեկի բնակարանը ոչ վաճառելու են, ոչ էլ առնելու են: Որոշ մարդիկ ու խմբեր կան, որ դա օգտագործում են իրենց քաղաքական նպատակներով, ուրիշ ոչինչ:

Ովքե՞ր են այդ մարդիկ:

Չենք իմանում: Ասեկոսեների մակարդակով լսել ենք:

Հետազոտությունն արդեն ավարտվե՞լ է, թե՞ դեռ ընթանում է:

Հետազոտությունն արդեն արվել է: Մեր կառավարությունը, մեր կառավարության ներկայացուցիչը' պրն Մովսիսյանը, մեր մարզպետը և ես պայմանագրի ստորագրման պահին հարց բարձրացրեցինք, որ բոլոր բնապահպանական խնդիրները մեր բնապահպանական օրենքի սահմաններում լուծելուց հետո նոր տվյալ հանքը կշահագործվի: Բնականաբար, դա նշանակում է, որ բնապահպանական խնդիր պետք է չառաջանա այս տարածքում: Եթե առաջանա, հանքը չի շահագործվի: Երկրորդը' մենք ուրախանում ենք այն փաստով, որ աշխատատեղ կբացվի, որ քաղաքում ներդրումներ կարվեն և այլն: Եթե բնապահպանական խնդիր չառաջանա, դա մեր համար նոր տեխնոլոգիաներով աշխատող հանք է, մեր տարածքի համար ձեռնտու կլինի: Բայց եթե մասնագետներն ապացուցեցին, որ բնապահպանական խնդիրներ են լինելու այս տարածքում, բնականաբար, մենք էլ ընդդիմադիր կլինենք այս հարցում:

Եղե՞լ եք տարածքում: Սարը շատ մոտ է քաղաքի բնակելի հատվածին, հատկապես Բանավան թաղամասին: Որքա՞ն մաքուր պետք է աշխատի հանքը, որ խնդիր չառաջացնի:

Այո, եղել եմ: Ես արդեն նշեցի, որ եթե բնապահպանական խնդիր առաջանա, հանքը չի շահագործվի: Դա մեր կառավարության պահանջն է: Երկրորդը' Դուք նայում եք հանքի այս մասը, բայց սա հանքը չէ: Հանքն այստեղից 2-ից մի քիչ էլ ավել հեռավորության վրա է: Այս սարը չէ, այն մյուս' հետևի սարն է: Այդ տարածքը հիմա մեր մոտ նստած է որպես գյուղնշանակության հողեր: Գիտեք, որ հանքը պետության ենթակայության տակ է, պետությունն է որոշում, թե հետագայում ինչ պետք է արվի, բայց մեր պետությունը ստորագրման պահին այդպիսի պահանջներ դրեց երկու կազմակերպության առջև:

Որքա՞ն տարածք է նախատեսված հանքի համար:

Դեռ մեզ չեն ներկայացրել: Դեռ ոչ մի բան չի եղել, բայց մարդիկ հարց են բարձրացնում: Ամբողջ տարածքն են ուսումնասիրել: Այս տարածքի ուսումնասիրությունը կատարվել է դեռ 50-ական թվականներից: Նոր ուսումնասիրություններ մեր կողմից կամ համապատասխան կառույցների կողմից չի եղել:

Քաղաքը և հարակից համայնքները սնուցող ջրի աղբյուրներն էլ են այնտեղից գալիս: Այդ հարցը ինչպե՞ս է լուծվելու:

Մեր քաղաքը, հարակից գյուղերն ու Չարենցավան քաղաքը սնվում են մեր մաքրման աղբյուրներից, որը դրանից ահագին մեծ հեռավորության վրա է գտնվում: Բնականաբար, մասնագետները պետք է աշխատեն այդ ուղղությամբ: Բոլորը գիտեն, որ այդ աղբյուրներն այդտեղ են գտնվում: Եթե այդտեղ որևէ խնդիր առաջանա, բնակչության թշնամի՞ն են իշխանավորները կամ համապատասխան կառույցները, թույլ չեն տա: Մենք այդ ամեն ինչը տեսնում ենք: Մասնագետները, տվյալ կառույցները, որոնք իրար հետ հարաբերվում են, պետք է գան ապացուցեն, ժողովրդի հետ պետք է հանդիպեն, դեռ ոչ մեկի հետ չեն հանդիպել: Բնականաբար մենք ժողովրդի հետ պետք է դիսկուսիաների նստենք, իրենց հետ խորհրդակցենք, ամեն ինչը պարզաբանենք: Նույնն էլ այդ կազմակերպությունները: Մասնագետները պետք է գան, մեզ համոզեն, որ այսպես են: Օդի մեջ խոսում ենք հիմա:

Բնապահպաններն ահազանգում են, որ եթե այդտեղ հանք շահագործվի, կլինեն պայթյուններ, և բնակչությանն ու բնությանը, միևնույն է, վտանգ սպառնում է: Որպես հրազդանցի, չեք կարծում, որ դա իսկապես կարող է վտանգավոր լինել:

Բնապահպանները մի մասով են նայում, միշտ ու ամեն տեղ բնապահպանական խնդիր են տեսնում: Բայց տվյալ կազմակերպությունները մատուցում են, որ ունեն հանքի մշակման նոր տեխնոլոգիաներ, այսինքն' ոչ ջրամբարներ պետք է լինեն, ոչ պայթյուններ: Մենք դեռ չենք իմանում, թե նրանք ինչ են մատուցելու, մենք առաջ ենք ընկնում: Մարդիկ եկել են, մեր պետության հետ հարաբերվում են, որ աշխատատեղ բացեն: Այսօր ամեն մեկը պետք է աշխատի, որ աջակցի մեր բնակչությանը: Եթե աշխատատեղ կա ու մարդն աշխատանք ունի, ինքը կապվում է այս հողին, այս ջրին, իսկ եթե մենք թունավորում ենք այդ մարդկանց, ուրեմն պետք է այդպիսի բաներ չլինեն:

Իսկ որքա՞ն աշխատատեղ կստեղծվի, եթե հանքը շահագործվի:

Սկզբնական շրջանում 2000, դեռ 3000-ի մասին էլ են խոսում:

Հնարավո՞ր է, որ չինացիներն էլ գան հանքում աշխատելու, թե՞ միայն տեղի բնակիչներն են աշատելու հանքում:

Պայմանագրի մյուս կետը դա է, որ լրիվ մասնագետները տեղացի պետք է լինեն, աշխատող ուժը պետք է տեղից լինի:

Դուք ծանո՞թ եք այդ պայմանագրին:

Ոչ:

Երաշխավորո՞ւմ եք, որ հանրային լսումներ կկազմակերպվեն և հաշվի կառնվի յուրաքանչյուր հրազդանցու ձայնը:

Բոլոր թաղերում մենք կազմակերպելու ենք հանրային լսումներ: Ամեն մի բնակիչ պետք է մասնակցի այդ լսումներին, իր կարծիքը հայտնի, մասնագետները պետք է գան բնակչությանը մատուցեն, որ դա վնասակար չէ մեր ազգաբնակչությանը, նոր գնան զեկուցեն համապատասխան տեղեր, որ կարելի է շահագործել: Դեռ այդ ամեն ինչը չի եղել:

Դրսում հոսանք չկա, որ ակցիայի մասնակիցները բարձրախոս միացնեն, կարգավորվե՞ց այդ հարցը (հարցազրույցն անցկացրել ենք բողոքի ակցիայի մեկնարկից րոպեներ առաջ-հեղ.):

Մենք հանձնարարել ենք, բայց հոսանքի չլինելուն մենք մեղավոր չենք: Կան կազմակերպություններ, որոնք ընտրել են տարածք: Մենք թույլտվությունը տվել ենք,ասել ենք' ձեր պիկետը կազմակերպեք: Դա շինարարական տարածք է, այնտեղ չունենք հոսանքի կետ, բերել ենք շենքերի տանիքներից և այլն: Հիմա ասել ենք, որ մոտիկ տեղերից, որտեղ տեղ կա, միացնեն լույսը: Մոտ 25 մարդ են հավաքվել, թող առանց բարձրախոսի խոսեն, պարտադիր է բարձրախոս լինի:

Դուք դուրս չե՞ք գալու բնակիչների մոտ:

Ես միշտ էլ դուրս եմ գալիս բնակիչների մոտ: Ինձ չեն հրավիրել:

Քաղաքապետին պետք է հրավիրե՞լ:

Ես ամեն օր էլ բնակիչների հետ հանդիպում եմ: Հիմա բնապահպաններն են եկել: Եթե անհրաժեշտություն կա, ես կարող եմ գալ:

Ձեր կարծիքով, այնուամենայնիվ, հանքի շահագործման թույլտվություն կտրվի՞, թե՞ ոչ:

Կախված է տվյալ կազմակերպության ներկայացնելուց, թե ոնց կներկայացնի բնապահպանական խնդիրների լուծումը:

Այսինքն' առաջնայինը բնապահպանակա՞ն խնդիրներն են:

Անպայման: