Մեծ Բրիտանիայի պաշտպանության նախարար Բեն Ուոլեսը կարծում է, որ Ուկրաինան արդեն այս տարի հնարավորություն ունի վերադարձնել Ղրիմը, որը Ռուսաստանին է միացվել 2014 թվականին։ Այդ մասին նա հայտարարել է The Washington Post-ին տված հարցազրույցում։

«Ինչպես մենք արդեն տեսել ենք մարտի դաշտում, եթե դուք սխալ տեղում հարված հասցնեք ռուսական զորքերին, նրանք իրականում կկործանվեն։ Դուք կարող եք մահվան ուղարկել տասնյակ հազարավոր երիտասարդների, ինչը և նրանք անում են, բայց դուք չեք կարող կախարդել տանկեր և սպառազինության համակարգեր, որի կարիքը նրանք ունեն»,- ասել է Ուոլեսը։

Բրիտանացի նախարարի կարծիքով՝ ռուսական կորուստների մասշտաբները խոսում են այն մասին, որ Ռուսաստանի նախագահ Վլադիմիր Պուտինը դեռևս հավատում է, որ կարող է պատերազմում հաղթել, եթե Ուկրաինա ուղարկի էլ ավելի շատ թվով զորքեր։

Մեծ Բրիտանիայի պաշտպանության նախարարը ենթադրել է, որ Պուտինը, հավանաբար, չի ստանում տեղեկատվություն տեղի ունեցողի մասին և կարող է չգիտակցել իր երկրի ռազմական խնդիրների մասշտաբները, «մինչև կործանման պահը»։ Ուոլեսը նշել է, որ եթե դա տեղի ունենա, ՆԱՏՕ-ն և Արևմուտքը «պետք է պատրաստ լինեն դրան»։

Բրիտանացի նախարարը նաև մեկնաբանել է ՆԱՏՕ-ին Ուկրաինայի անդամակցության հնարավորությունը։ Ըստ նրա՝ պահպանվում են այս հարցի շուրջ տարաձայնությունները։ «Մենք պետք է իրատես լինենք և ասենք, որ Վիլնյուսում (խոսքը 2023 թվականի ամռանը Լիտվայի մայրաքաղաքում կայանալիք ՆԱՏՕ-ի գագաթնաժողովի մասին է-խմբ.) դա տեղի չի ունենա, դա տեղի չի ունենա նաև մոտակա ժամանակահատվածում»,- նշել է Բեն Ուոլեսը։

Ուկրաինայի իշխանությունները մի քանի անգամ հայտարարել են, որ Ռուսաստանի հետ պատերազմը կարող է ավարտվել միայն բռնազավթված տարածքներից ռուսական զորքերի հեռանալուց և Ուկրաինայի միջազգայնորեն ճանաչված սահմանների վերականգնումից հետո, այսինքն` ներառյալ նաև Ղրիմը։

2023 թվականի ապրիլին Ուկրաինայի նախագահի գրասենյակի ղեկավարի տեղակալ Անդրեյ Սիբիգան նշել էր, որ Կիևը պատրաստ է բանակցություններ վարել Մոսկվայի հետ՝ թերակղզու վերադարձի պայմանների վերաբերյալ, եթե Ուկրաինայի զինված ուժերը հակահարձակման ժամանակ հասնեն թերակղզու սահմաններին։

Լուսանկարը՝ Kirsty Wigglesworth/AP