![](/static/articles/15/71/51/l-VM2ddx2d4b.jpg)
Ֆրանսիայի նախկին նախագահ Նիկոլա Սարկոզիի տանը խուզարկություն է եղել
Ոստիկանությունը խուզարկել է Ֆրանսիայի նախկին նախագահ Նիկոլա Սարկոզիի տունը։ Քննչական գործողությունները իրականացվել են լիբիական իշխանությունների կողմից 2007 թվականին նրա ընտրարշավի հնարավոր ֆինանսավորման գործի հետաքննության շրջանակներում: Այդ մասին գրում է Deutsche Welle-ն՝ հղում անելով dpa լրատվական գործակալությանը։
Գործակալության տվյալներով՝ քննիչները հարցաքննել են նաև նախկին նախագահ Սարկոզիին։ Նոր ստուգումների առիթ է դարձել այս գործով մեղադրող կողմի գլխավոր վկայի՝ նախկինում տված ցուցմունքներից հրաժարվելը։
Լիբանանյան ծագմամբ ֆրանսիացի գործարար Զիյադ Թաքիեդինը 2016 թվականին հայտարարել էր, որ 2006 թվականի վերջին կամ 2007 թվականի սկզբին միջնորդ է եղել Լիբիայի իշխանություններից «փողերով ճամպրուկները» Ֆրանսիայի ՆԳՆ-ին փոխանցելու հարցում, որն այն ժամանակ գլխավորում էր Սարկոզին: Գումարը, իբր, օգտագործվել է Սարկոզիի քարոզարշավը ֆինանսավորելու համար: Ավելի ուշ, Թաքիեդինը անսպասելիորեն հրաժարվել է իր խոսքերից։
dpa-ը նշում է, որ ֆրանսիական դատական մարմինները հետաքննում են վկայի վրա ճնշման գործադրման փաստը։
Լուսանկարը՝ Reuters գործակալության
Մեկնաբանել