Վրաստանի խորհրդարանը վավերացրել է «Վրաստանի Հանրապետության կառավարության և Ադրբեջանի Հանրապետության կառավարության միջև պաշտպանության ոլորտում համագործակցության մասին» համաձայնագիրը: Այդ մասին հայտնում է Վրաստանի խորհրդարանի մամուլի ծառայությունը։

«Համաձայնագրով սահմանված համագործակցության ոլորտներն են՝ ռազմական կրթությունը, վարժանքներն ու ուսուցումը, պաշտպանության և անվտանգության քաղաքականությունը, համագործակցությունը ՆԱՏՕ-ի «Գործընկերություն հանուն խաղաղության» ծրագրի շրջանակներում, ռազմական օրենսդրությունը, ռազմական տեղագրությունը, ռազմական բժշկությունը, կիբերանվտանգությունը պաշտպանության ոլորտում, սոցիալական, սպորտային և մշակութային միջոցառումները»,- ասված է հայտարարության մեջ։

Փաստաթուղթը ենթադրում է կողմերի համագործակցություն այնպիսի ձևաչափերով, ինչպիսիք են` պաշտոնական այցերը և աշխատանքային հանդիպումները, երկկողմ բանակցությունները, խորհրդատվություններն ու փորձի փոխանակումը, ընդհանուր հետաքրքրություն ներկայացնող տեղեկատվության փոխանակումը, մասնակցությունը գիտաժողովներին և սեմինարներին:

Համաձայնագիրն անժամկետ է: Ցանկացած երկիր, որը որոշում է դուրս գալ դրանից, պետք է դիվանագիտական ուղիներով տեղեկացնի երկրորդ կողմին իր մտադրության մասին։

Այս համաձայնագիրը Վրաստանի և Ադրբեջանի միջև կնքվել էր Բաքվում դեռ ապրիլին։ Վրաստանից այն ստորագրել էր պաշտպանության նախարար Ջուանշեր Բուրչուլաձեն, իսկ Ադրբեջանի անունից՝ պաշտպանական գերատեսչության ղեկավար Զաքիր Հասանովը։

Լուսանկարը՝ Ադրբեջանի ՊՆ մամուլի ծառայության