ԱՄՆ Կենտրոնական հետախուզական վարչության տնօրեն Ուիլյամ Բերնսը հայտարարել է, որ «Վագներ» մասնավոր զինվորական ընկերության հիմնադիր Եվգենի Պրիգոժինի ապստամբության փորձը ցույց է տվել, թե ինչ բացասական ազդեցություն ունի ռուսական հասարակության վրա Ուկրաինա ռուսական զորքերի ներխուժումը։ Այդ մասին, ինչպես գրում է Reuters գործակալությունը, Բերնսը հայտարարել է՝ Անգլիայի Օքսֆորդշիր քաղաքում տեղակայված Դիթչլի հիմնադրամում իր դասախոսության ժամանակ։

Բերնսը «ապշեցուցիչ» է անվանել այն հանգամանքը, որ Պրիգոժինը ապստամբությունից առաջ Կրեմլին քննադատել է նրա համար, որ ռուսական ղեկավարությունն Ուկրաինա ներխուժումն սկսել է կեղծ պատրվակով, ինչպես նաև քննադատել պատերազմի ժամանակ ռազմական հրամանատարության գործողությունները։

«Այդ խոսքերի և գործողությունների ազդեցությունը դեռ որոշ ժամանակ կդրսևորվի որպես վառ հիշեցում պուտինյան պատերազմի կործանարար ազդեցության մասին՝ սեփական հասարակության և սեփական վարչակարգի վրա»,- հայտարարել է Բերնսը։  

ԿՀՎ ղեկավարը Պրիգոժինի ապստամբությունն անվանել է «ռուսական պետությանը զինված մարտահրավեր», սակայն նշել, որ դա «Ռուսաստանի ներքին գործն է, որտեղ ԱՄՆ-ն չի ունեցել և չի ունենա որևէ մասնակցություն»։

Իր ելույթի ժամանակ Բերնսը նաև նշել է, որ ռուսական հասարակության մեջ պատերազմից դժգոհությունը ամերիկյան հատուկ ծառայության աշխատակիցներին հնարավորություն է տվել լրտեսներ հավաքագրել ՌԴ-ում: «Այդ դժգոհությունը մեր՝ ԿՀՎ աշխատակիցների համար, ստեղծում է հնարավորություն»,- ասել է նա՝ մեկնաբանելով գործակալների հավաքագրման մասին հարցը։

Հիշեցնենք, որ ԱՄՆ Կենտրոնական հետախուզական վարչության ներկայիս ղեկավար Ուիլյամ Բերնսը 2005-2008 թվականներին զբաղեցրել է Ռուսաստանում ԱՄՆ դեսպանի պաշտոնը։

Լուսանկարը՝ Bill Clark / CQ Roll Call via AP file