![](/static/articles/15/80/88/l-4WLXDHFqNJ.jpg)
Ռուսական զորքերն անօդաչուներով հարձակվել են Կիևի վրա. կա մեկ զոհ
Ռուսաստանի զինված ուժերը հուլիսի 13-ի գիշերը Կիևի ուղղությամբ անօդաչուներ են արձակել։ Ինչպես նշում է ուկրաինական կողմը, ՀՕՊ միջոցները Ուկրաինայի մայրաքաղաքի երկնքում խոցել են մոտ 10 անօդաչու։ Դրանց բեկորներն ընկել են Կիևի մի շարք շրջաններում։
Քաղաքապետ Վիտալի Կլիչկոն հայտնել է, որ տուժել է առնվազն 4 մարդ։ Նրա տվյալներով՝ մեկ մարդ զոհվել է հրդեհի ժամանակ, որն առաջացել էր Կիևի Պոդոլսկի շրջանում՝ անօդաչուի բեկորի ընկնելու հետևանքով։
Իր հերթին, Ուկրաինայի ռազմաօդային ուժերի հրամանատարությունը հայտարարել է, որ Ուկրաինայի ողջ տարածքում ռուսական զորքերն արձակել են 20 անօդաչու և երկու թևավոր հրթիռ, որոնք բոլորը խոցվել են։
Արդեն երեք օր շարունակ ռուսական զորքերն անօդաչուներով հարձակվում են Կիևի վրա։ Հուլիսի 11-ին և 12-ին Ուկրաինայի մայրաքաղաքի ռազմական վարչակազմը հայտնել էր, որ Կիևում տուժածներ և ավերածություններ չկան, իսկ բոլոր անօդաչուները հաջողվել է խոցել։
Լուսանկարը՝ Կիևի քաղաքային ռազմական վարչակազմի մամուլի ծառայության
Մեկնաբանել