Հայաստանի երկրորդ նախագահ Ռոբերտ Քոչարյանի ընտանիքի բոլոր չափահաս անդամները հրավիրվել են Գլխավոր դատախազության ապօրինի ծագում ունեցող գույքի բռնագանձման գործերով վարչություն: Ռոբերտ Քոչարյանին և նրա ավագ որդուն՝ Սեդրակ Քոչարյանին պատկանող գույքի առնչությամբ իրականացվում են ուսումնասիրություններ, որոնց արդյունքում կազմվել են ամփոփագրեր:

Ռ. Քոչարյանը, կինը՝ Բելլա Քոչարյանը, դուստրը՝ Գայանե Քոչարյանը, վերջինիս ամուսինը՝ Վիգեն Չատինյանը, երկու որդիները՝ Լևոն ու Սեդրակ Քոչարյանները, նրանց կանայք՝ երգչուհի Սիրուշոն (Սիրանուշ Քոչարյան) և Զարուհի Բադալյանը, օգոստոսի 1-ին հրավիրվել են Դատախազություն, որպեսզի ծանոթանան գործի նյութերին:

Ռոբերտ Քոչարյանի և նրա ընտանիքի վերը նշված անդամների անվամբ հաշվառված գույքը հանդիսանում է բռնագանձման առարկա:

Հիշեցնենք, որ Գլխավոր դատախազությունն այս փուլում չի հրապարակում ոչ բռնագանձման ենթակա գույքի ցանկը, ոչ էլ դրամական միջոցների կամ ակտիվների չափը:

Պատճառաբանությունն այն է, որ շահագրգիռ անձանց բացատրությունների, ներկայացրած ապացույցների հիման վրա կարող է այդ ցանկը փոփոխվել: