Իրաքի կապի նախարարությունը հայտարարել է այդ երկրում Telegram մեսենջերի արգելափակման մասին։

Ինչպես գրում է Reuters գործակալությունը, այդ որոշումը պայմանավորված է «ազգային անվտանգության նկատառումներով և օգտատերերի անձնական տվյալների պաշտպանության համար»։

Գերատեսչությունում հայտարարել են, որ դիմել են Telegram-ի ղեկավարությանը՝ խնդրելով ջնջել մի շարք ալիքներ, որոնք հրապարակում են օգտատերերի անձնական տվյալները և պետական մարմիններից տեղեկատվություն։ Սակայն, ինչպես պնդում են իրաքյան իշխանությունները, ընկերությունը որևէ հարցման մասով չի պատասխանել և չի փոխգործակցել իշխանությունների հետ։

«Կապի նախարարությունը վերահաստատում է իր հարգանքը քաղաքացիների ազատ խոսքի իրավունքի և հաղորդակցության նկատմամբ՝ առանց պետության անվտանգությանն ու դրա ինստիտուտներին վնաս հասցնելու»,- Իրաքի կառավարությանը մեջբերել է Reuters գործակալությունը։

Telegram-ն ամբողջությամբ արգելափակված է միայն Իրանում և Չինաստանում։ Հավելվածի աշխատանքները տարբեր ժամանակներ արգելափակել են Ռուսաստանը, Բելառուսը, Ղազախստանը, Աֆղանստանը, Բրազիլիան, Հնդկաստանը, Ինդոնեզիան։

Լուսանկարը՝ Reuters գործակալության