«Իսլամական պետություն» ահաբեկչական խմբավորումը հաստատել է իր առաջնորդ Աբու Հուսեյն ալ-Հուսեյնի ալ-Քուրեշիի մահը և հայտնել նրա իրավահաջորդի անունը։ Ահաբեկչական խմբավորման մամուլի քարտուղարի խոսքով՝ «Իսլամական պետություն» ահաբեկչական խմբավորման պարագլուխ է ընտրվել Աբու Հաֆսա ալ-Հաշիմի ալ-Քուրեշին։

Աբու Հուսեյն ալ-Հուսեյնի ալ-Քուրեշին «Իսլամական պետություն» ահաբեկչական խմբավորումը ղեկավարում էր 2022 թվականի նոյեմբերից, այն բանից հետո, երբ Սիրիայում սպանվեց նախորդ պարագլուխը։ 

Աղբյուրների մի մասը պնդում են, որ նրա սպանության հետևում կանգնած է «Ալ-Քաիդա» ահաբեկչական խմբավորումը։ Որոշ աղբյուրներ էլ պնդում են, որ Քուրեշին սպանվել է ավիահարձակման հետևանքով։

«Իսլամական պետության» գրոհայինները շարունակում են իրենց հարձակումները Սիրիայում և Իրաքում։ Հազարավոր գրոհայիններ հիմնականում թաքնվում են երկու երկրների առանձին շրջաններում, սակայն դեռևս կարողանում են հանկարծակի հարձակումներ իրականացնել։

Լուսանկարը՝ Associated Press գործակալության