Ապօրինի շինարարությունը կասեցվել է
ՀՀ ԱԻՆ ճգնաժամային կառավարման կենտրոնում այսօր Երևանի Սայաթ-Նովա 15 շենքի բնակիչներից ահազանգ էր ստացվել, որ շենքի նկուղում իրականացվում են շինարարական աշխատանքներ, որոնք սպառնում են շենքի սեյսմակայունությանը:
Դեպքի վայր են մեկնել ՀՀ ԱԻՆ ՃԿԿ օպերատիվ խումբը, փրկարար ծառայության և ՍՊԱԾ գործակալության մասնագետներ: Տեղում պարզելով շինարարական աշխատանքների թույլտվության բացակայությունը՝ ԱԻՆ աշխատակիցներն արգելել են հետագա աշխատանքների իրականացումը:
Դեպքի վայրում ուսումնասիրություն կատարած ԱԻՆ աշխատանքային խմբի մասնագետների կարծիքով՝ ներկայում շենքին վտանգ չի սպառնում:
Ինչպես դեպքի վայրից հաղորդեց ՓԾ տարերային աղետների բաժնի պետ, փ/ծ փոխգնդապետ Արթուր Մուրադյանը, նկուղում շինարարական աշխատանքները դադարեցվել են, մինչև փրկարար ծառայությունը և ՍՊԱԾ-ը կտան մասնագիտական եզրակացություն՝ սեյսմիկ անվտանգության տեսանկյունից տվյալ վայրում շինարարական աշխատանքներ իրականացնելու համար:
«Միաժամանակ միջոցներ են ձեռնարկվում ճշտելու, թե ո՞վ և ի՞նչ չափով է թույլատրել տվյալ վայրում կատարել շինարարական աշխատանքներ»,- հայտնում է ԱԻՆ կայքը:
Մեկնաբանել