Չնայած Գագիկ Ծառուկյանը Մարտուն Գրիգորյանին ասել էր' մի տասնհինգ օր սպասի, կասեմ՝ Գյումրիի քաղաքապետի ընտրություններում դնելո՞ւ ես թեկնածությունդ, թե՞ ոչ, շաբաթ-կիրակի օրերին, ինչպես տեղեկացնում են ԲՀԿ-ում «Հրապարակի» աղբյուրները, արդեն իսկ որոշումը կայացվել է:

Ըստ ամենայնի, Գյումրիում քաղաքապետի թեկնածու կառաջադրվի Սամվել Բալասանյանը, իսկ նրա մեծամասնական ընտրատարածքում պատգամավոր կառաջադրվի Արման Սահակյանը: Ըստ ԲՀԿ-ի՝ հարցը համաձայնեցված է նաև ՀՀԿ-ի հետ կոնսենսուսային տարբերակով:

Ճիշտ է՝ Մարտունի կողմնակիցները ոչ միայն դժգոհ են այս որոշումից, այլև անվստահության ակնարկներ են անում ՕԵԿ-ից ԲՀԿ տրանզիտ արված Բալասանյանի հասցեին, այնուհանդերձ, Գյումրիի ԲՀԿ-ականներն իրենց հումորը չեն կորցնում. «Բալասանյանը ճիշտ կանի՝ հանի հրապարակում Վարդանիկի դրած Վարդանանց արձանը, պիվի գործարանի դեմի իր արձանը բերի-դնի տեղը, մանավանդ օր պիվի գործարանը շատ մոդիկ է հրապարակին»:

Չնայած Գյումրիում, առանց այդ արձանի էլ, անչափ հետաքրքիր ընտրություններ են սպասվում: Վարդանիկն էլ իր հերթին է հայտարարել՝ գնալու եմ մինչև վերջ: