Գեղարքունիքի մարզի Լճավան գյուղի բնակիչներն այդպես էլ չեն ստացել ՀՀ կառավարության կողմից դեռևս այս տարվա փետրվարին խոստացված էժան պարարտանյութը՝ չնայած անհրաժեշտ գումարը լճավանցիները նախապես վճարել են:

Երեկ շուրջ 50 լճավանցիներ հավաքվել էին նախագահական նստավայրի դիմաց և փորձել են ՀՀ ղեկավարությանը համոզել, որ իրենց հասանելիք պարարտանյութը վերջապես տան:

Ազոտական պարարտանյութի 50 կիլոգրամանոց պարկը 6 հազար դրամով գյուղացիներին տրամադրելու ՀՀ կառավարության ծրագիրը ավարտվել է դեռևս մայիսին: Իսկ ինչո՞ւ են լճավանցիները նման վերաբերմունքի արժանացել, այդ ո՞ր «մեղքի» համար են ՀՀ իշխանությունները որոշել նրանց նման ձևով պատժել:

Պարզվում է՝ Լճավանը Գեղարքունիքի այն եզակի գյուղերից է, որտեղ մայիսի 6-ի խորհրդարանական ընտրություններում իշխող ՀՀԿ-ն պարտվել է: ԱԺ ընտրությունների պաշտոնական արդյունքներով Լճավանում ամենաշատ՝ 122 քվե ստացել է ԲՀԿ-ն, իսկ ՀՀԿ-ի օգտին տրված քվեաթերթիկների թիվը եղել է 105: