ԱՄՆ-ն կրկին կոչ է անում անհապաղ վերաբացել Լաչինի միջանցքը մարդասիրական, առևտրային և ուղևորափոխադրումների համար։ Նման հայտարարությամբ լրագրողների հետ ճեպազրույցի ժամանակ հանդես է եկել Պետքարտուղարության մամուլի ծառայության ղեկավարի տեղակալ Վեդանթ Փաթելը։

«Մենք խորապես մտահոգված ենք Լեռնային Ղարաբաղում մարդասիրական պայմանների վատթարացմամբ, ինչը սննդամթերքի, դեղորայքի և առաջին անհրաժեշտության այլ ապրանքների շարունակական արգելափակման հետևանք է»,- հայտարարել է ամերիկացի պաշտոնյան։

Նրա խոսքով՝ ԱՄՆ-ն վերջին մի քանի շաբաթներին շարունակել է աշխատել երկու կողմերի հետ, որպեսզի մարդասիրական օգնությունը հասնի Լեռնային Ղարաբաղի բնակչությանը։

«Եվ մենք կրկնում ենք մեր կոչը՝ անհապաղ վերաբացել Լաչինի միջանցքը մարդասիրական, առևտրային և ուղևորափոխադրումների համար» - պնդել է Փաթելը։

Լուսանկարը՝ Associated Press գործակալության