Սննդամթերքի անվտանգության տեսչական մարմնի կողմից իրականացվող վերահսկողության ընթացքում ոչ սպանդանոցային մորթի արդյունքում ստացված մսի հայտնաբերման դեպքում կկասեցվի տվյալ խմբաքանակի իրացումը, միսը կառգրավվի և կոչնչացվի տեսչական մարմնի կողմից։ Այդ դեպքում ոչնչացման հետ կապված ծախսերը հետագայում կգանձվի իրավախախտում իրականացնող տնտեսվարողից։ Այս մասին տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի հերթական նիստի ժամանակ հայտնեց վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Պետրոս Մարտիրոսյանը։

Ոչ սպանդանողային մորթ կթույլատրվի իրականացնել երեք դեպքում՝ 

• անձնական սպառման համար, այդ թվում՝ կրոնական և այլ ընդունված ծիսակատարությունների նպատակով՝ պահպանելով հակահամաճարակային միջոցառումները,
• որսորդության և ձկնորսության ժամանակ,
• կենդանիների առողջական վիճակի ֆիզիկական և ֆունկցիոնալ լուրջ անվերականգնելի խանգարումներով պայմանավորված անասնաբույժի ցուցումով կենդանու անկումը բացառելու նպատակով։

«Այս նախաձեռնության նպատակն է ապահովել սպառման համար օգտագործվող մսի սպանդանոցային ծագման ապահովումը, որը միտված է պաշտպանելու հանրության կյանքն ու առողջությունը։ Նախատեսվում է ավելի ճկուն դարձնել շրջիկ սպանդանոցների մեխանիզմը, որ երբ տնտեսվարողն ուզենա, որ կենդանին սպանդանոցային մորթի ենթարկվի սահմանված կարգով դիմի, շրջիկը գա, մորթն իրականացնի, տեղեկանքը տա»,- նշեց Մարտիրոսյանը։

Ըստ Մարտիրոսյանը՝ Սպանդանոցները շուրջ 100 են, գործողները՝ 50-60-ը։ 

Հանձնաժողովի անդամ Արման Ղազարյանի խոսքով՝ նախագիծը լրացուցիչ և դժվարություն, և ֆինանսական բեռ է դնելու ժողովրդի վրա։

«Մեր լեզվով ասած՝ ղասաբը գալու ա, մտնի բազառի մեջ, ասի ընկեր՝ նախկինում միսը քեզնից 3200 դրամով էի վերցնում, հիմա ևս 100 դրամ պետք է թանկացնել, որովհետև տանելու եմ Սևանի սպանդանոց։ Ապրանքն ավելի էժան է վաճառելու, որովհետև ղասաբը գալու ա սպանդանոցի, դժվարությունների անվան տակ էժան առնի, լրացուցիչ շահույթ հետապնդի։ Մեր բերած ոչ կատարյալ օրենքի արդյունքում պրոբլեմ ենք սարքելու մեր տնտեսվարողի համար»,- քննարկման ժամանակ հայտնեց Ղազարյանը։

Հանձնաժողովի նախագահ Վահե Ղալումյանն արձագանքեց՝ նշելով, որ օրենքի նածագիծը հնարավորինս բացառում է ոչ սպանդանոցային մսի շրջանառությունը։

«Մեր ժողովուրդը պատրաստ է կիլոգրամի համար 100-200 դրամ ավել վճարել, բայց ունենալ իր առողջության համար անվտանգ սնունդ, սրան այլընտրանք գոյություն չունի»,- ասաց նա։

Օրենքի նախագիծը երկրորդ ընթերցմամբ դրական եզրակացություն ստացավ։