«Խոստովանեք, որ նման բարձր մակարդակի ընդունելության քննություններ Հայաստանում վաղուց չէին անցկացվել։ Ես քննությունների հետ կապված բողոքներ գրեթե չեմ ստացել, հակառակը՝ հաճախ մոտենում են ծնողներ և շտեմարանների և այլ բարեփոխումների համար շնորհակալություն հայտնում»,- այսօրվա մամուլի ասուլիսում ասել է կրթության և գիտության նախարար Արմեն Աշոտյանը:

Նրա խոսքերով՝ բուհական ընդունելության քննություններն անցնում են շատ բնականոն:

Անդրադառնալով մագիստրատուրայի և ասպիրանտուրայի ընդունելության քննություններին՝ բանախոսն ասել է, որ պետպատվերի շրջանակում ընդունելությունն արդեն ավարտվել է: Ասպիրանտուրայում և մագիտրատուրայում այս տարի տարկետման իրավունքով պետպատվերի թափուր տեղեր կան, ինչը պայմանավորված է օտար լեզվի իմացության պահանջի խստացմամբ:

«Այս պահին ասպիրանտուրայում ունենք 11 թափուր տեղ. դեռևս բժշկական մասնագիտությունների համար ընդունելությունն ավարտված չէ: Մագիստրատուրայում ունենք 39 անվճար թափուր տեղեր, որոնք բոլորը, կառավարության կողմից հատկացված 99 լրացուցիչ տեղի հետ միասին, հատկացվելու են բանակից զորացրվածներին»,- ասել է Արմեն Աշոտյանը:

Նրա խոսքերով՝ զինծառայությունը չի տարանջատվում կրթությունից, այլ հակառակը՝ «մենք խրախուսում ենք այն տղաներին, ովքեր զինծառայությունից հետո որոշում են շարունակել կրթությունը»:

Արմեն Աշոտյանը նշել է, որ բուհական պետական ավարտական քննություններին այս տարի առաջին անգամ անցկացվել են նոր կարգերի համաձայն: Պետական քննությունների հետ կապված բողոքների հոսքը դեպի նախարարություն այս տարի նվազել է, քանի որ նոր կարգով քննությունները ձայնագրվում և 48 ժամ պահպանվում են, ինչն ուսանողներին հնարավորություն է ընձեռում անհարաժեշտության դեպքում բողոքարկել և պաշտպանել սեփական իրավունքները: