Իշխող «Քաղաքացիական պայմանագիր» խմբակցության պատգամավոր Սոնա Ղազարյանը կառավարության անդամների հետ հարցուպատասխանի ժամանակ արտաքին գործերի նախարար Արարատ Միրզոյանից հետաքրքրվեց Ադրբեջանի հետ՝ խաղաղության և հարաբերությունների կարգավորման պայմանագրի շուրջ տարվող աշխատանքների մասին: Նշեց, որ խորհրդարանը 2 ամիս արձակուրդի մեջ է եղել, և լրատվամիջոցներից են տեղեկացել, որ հայկական կողմը առաջարկներ է ներկայացրել ադրբեջանական կողմին:

Արարատ Միրզոյանը նշեց, թե «ցավալիորեն հարցի պատասխանը կարճ է»: Նախարարն ասաց, որ հայկական կողմը Ադրբեջանին է փոխանցել պայմանագրի նախագծի 5-րդ խմբագրված տարբերակը, երեկ ստացվել են ադրբեջանական կողմի նոր առաջարկները:

«Գործընթաց կա, քննարկում կա: Իհարկե, առերես բանակցություններ այս ընթացքում՝ հունիսից հետո, չեն եղել: Կրկին  դժբախտաբար, պետք է ասեմ, որ էական հարցեր կան, որտեղ կողմերի դիրքորոշումները բավականին հեռու են միմյանցից»,- նշեց Արարատ Միրզոյանը: