Ֆրանսիան խստագույնս դատապարտում է Ադրբեջանի կողմից Լեռնային Ղարաբաղում ծանր զինատեսակների կիրառմամբ ռազմական գործողություն սկսելը, այդ թվում՝ բնակեցված տարածքներում։

«Ոչ մի պատրվակ չի կարող արդարացնել նման միակողմանի գործողությունը, որը սպառնում է հազարավոր խաղաղ բնակիչների, որոնք արդեն տուժել են ամիսներ շարունակ ապօրինի շրջափակումից և հակասում են միջազգային հանրության ջանքերին՝ հասնելու բանակցությունների միջոցով կարգավորման»,- նշված է Ֆրանսիայի ԱԳՆ հաղորդագրության մեջ:

Ֆրանսիան Ադրբեջանին կոչ է անում անհապաղ դադարեցնել հարձակումը և վերադառնալ միջազգային իրավունքին։ Պաշտոնական Փարիզը նաեւ հայտարարում է, որ Ադրբեջանին միանձնյա պատասխանատու կհամարի Լեռնային Ղարաբաղի խաղաղ բնակչության ճակատագրի համար։

«Ֆրանսիան պահանջում է ՄԱԿ-ի Անվտանգության խորհրդի արտակարգ նիստ՝ սերտորեն համագործակցելով իր եվրոպացի և ամերիկացի գործընկերների հետ՝ այս անընդունելի հարձակմանը ուժեղ պատասխան տալու համար՝ համարժեք այն վտանգներին, որոնք այն ներկայացնում է տարածաշրջանի անվտանգության համար»,- նշված է արտաքին գերատեսչության հաղորդագրության մեջ։

Լուսանկարում՝ Ֆրանսիայի ԱԳ նախարար Կատրին Կոլոննան