Արցախի վրա ադրբեջանական հարձակումից հետո Երևանում ամեն օր տեղի են ունենում բողոքի ցույցեր ու հանրահավաքներ։ Այսօր արդեն երրորդ օրն է, ինչ քաղաքացիները հավաքվում են Հանրապետության հրապարակում՝ ՀՀ վարչապետ Նիկոլ Փաշինյանի հրաժարականի պահանջով։ Այսօրվա պահանջների մեջ էր նաև արցախահայության անվտանգ տարհանման հարցը։ Ընդդիմության երեկոյան հանրահավաքի ժամանակ հայտարարվեց, որ իշխանափոխությունը խաղաղ ճանապարհով իրականացնելու համար անհրաժեշտ է իրականացնել բողոքի լայնածավալ խաղաղ ակցիաներ՝ կոլապսի ենթարկել մայրաքաղաքի երթևեկությունը, սկսել դասադուլներ ու գործադուլներ։ 

Հիշեցնենք, որ սեպտեմբերի 19-ից ադրբեջանական զինված ուժերը հարձակվել են Արցախի վրա՝ թիրախավորելով քաղաքացիական բնակչությանն ու ենթակառուցվածքները՝ բնակելի շենքեր, դպրոցներ: Կան բազմաթիվ վիրավորներ և զոհեր: