Համացանցում տարածվող լուրերն այն մասին, որ Ղազախստանն ու Հայաստանը մտադիր են դուրս գալ Հավաքական անվտանգության պայմանագրի կազմակերպության կազմից, չեն համապատասխանում իրականությանը։ Այդ մասին հայտարարել է Ղազախստանի ԱԳՆ պաշտոնական ներկայացուցիչ Այբեկ Սմադիյարովը։ 

«Տեղեկատվություն է տարածվում, որ, իբր, Ղազախստանն ու Հայաստանը բանակցություններ են վարում (ՀԱՊԿ-ից դուրս գալու մասին-խմբ.)։ Դա, ամենայն հավանականությամբ, չի համապատասխանում իրականությանը։ Մի քանի օր առաջ ՀԱՊԿ անդամ երկրների արտաքին գործերի նախարարները խորհրդակցություն են անցկացրել և այնտեղ քննարկվել են կազմակերպության զարգացման հետագա ուղիները»,- Աստանայում կայացած մամուլի ասուլիսի ժամանակ հայտարարել է ղազախ դիվանագետը։ 

Բացի այդ, Ղազախստանի ԱԳՆ ներկայացուցիչը հերքել է նաև այն տեղեկությունը, որ Հայաստանը ՀԱՊԿ-ից ռազմական օգնություն է խնդրել՝ Լեռնային Ղարաբաղում վերջին իրադարձությունների ֆոնին։ «Ո՛չ, չի եղել։ Ե՛վ Ղազախստանից չի խնդրել, և՛ ՀԱՊԿ շրջանակներում նման բան չի եղել»,- ասել է Սմադիյարովը։

Ավելի վաղ, ղազախական որոշ լրատվամիջոցներ, հղում անելով իրենց աղբյուրներին, հայտնել էին, որ Ղազախստանն ու Հայաստանը կառավարությունների ու հատուկ ծառայությունների գծով ՀԱՊԿ-ից դուրս գալու շուրջ բանակցություններ են վարում։ Հիշեցնենք, որ այդ կազմակերպությանն անդամակցում են Հայաստանը, Բելառուսը, Ղազախստանը, Ղրղզստանը, Ռուսաստանն ու Տաջիկստանը։

Լուսանկարը՝ ՀՀ ՊՆ մամուլի ծառայության