Կրեմլը դեռևս որևէ կոնկրետություն չի տեսնում Լեռնային Ղարաբաղի հարցով միջազգային դիտորդական առաքելություն ստեղծելու ԱՄՆ գաղափարի մեջ։ Այդ մասին TACC գործակալության փոխանցմամբ հայտարարել է ՌԴ նախագահի մամուլի քարտուղար Դմիտրի Պեսկովը։

«Ոչ, այստեղ ինչ-որ կոնկրետություն մենք դեռ չենք տեսնում։ Եվ հետո, ցանկացած առաքելություն կարող է գոյություն ունենալ միայն ադրբեջանական կողմի համաձայնությամբ»,- ասել է Պեսկովը՝ պատասխանելով այն հարցին, թե արդյոք Ռուսաստանն այս հարցով շփումներ է ունեցել ԵԱՀԿ Մինսկի խմբի համանախագահ մյուս երկրների հետ։

Պեսկովը հավելել է, որ Մոսկվան իր հերթին շարունակում է շփումները և՛ Երևանի, և՛ Բաքվի, ինչպես նաև Լեռնային Ղարաբաղի էթնիկ հայերի հետ:

Պեսկովը հայտարարել է, որ ՌԴ-ն, ի տարբերություն ԱՄՆ-ի, փաստացի ներգրավված է Ղարաբաղյան կարգավորման գործընթացում: «Դժվար թե կարելի է ամերիկացիների ներգրավվածության հետ համեմատել մեր փոխգործակցության մակարդակը և ներգրավվածությունն այդ փոխգործակցությանը»,- նշել է Կրեմլի ներկայացուցիչը՝ ընդհանուր առմամբ խոսելով հայ-ռուսական համագործակցության մասին:

«Դուք գիտեք, թե, ըստ ունեցած մանդատի, ինչ դեր են խաղում մեր խաղաղապահները։ Մենք մտադիր ենք դա շարունակել»,- հավելել է ՌԴ նախագահի մամուլի քարտուղարը։

Հիշեցնենք, որ ավելի վաղ, ԱՄՆ պետքարտուղարության մամուլի ծառայության ղեկավար Մեթյու Միլերը հայտարարել էր, որ ԱՄՆ-ն մտադիր է Լեռնային Ղարաբաղի հարցով միջազգային առաքելություն ստեղծել, որը կհետևի այնտեղ ապրող մարդկանց իրավունքների պաշտպանությանը։

«Մենք կարծում ենք, որ պետք է լինի միջազգային առաքելություն, որը կերաշխավորի <...> Լեռնային Ղարաբաղի բնակիչների համար, <...> որ նրանց իրավունքներն ու անվտանգությունը ապահովվեն Ադրբեջանի հրապարակային հայտարարություններին համապատասխան»,- նշել էր Միլերը։ Նրա խոսքով՝ Միացյալ Նահանգներն այս ուղղությամբ աշխատում է իր դաշնակիցների ու գործընկերների հետ։

Լուսանկարը՝ РИА Новости/Алексей Майшев