Ֆրանսիան մտադիր է նոր ռազմական կցորդ նշանակել Երևանում ու պատրաստվում է հյուպատոսություն բացել Հայաստանի Սյունիքի մարզում։ Այդ մասին հայտարարել է Ֆրանսիայի արտաքին գործերի նախարար Կատրին Կոլոնան՝ հանդես գալով այդ երկրի խորհրդարանում։ 

Haut-Karabagh : "Aucun pays n'aide davantage l'Arménie que notre pays", clame @MinColonna. "Toutes les réunions du Conseil de sécurité des Nations unies se sont tenues à l'initiative de la France."#DirectAN #QAG pic.twitter.com/RrLzbUOvzG

— LCP (@LCP) September 26, 2023

«Մենք կամրապնդենք պաշտպանության ոլորտում Հայաստանի հետ մեր համագործակցությունը։ Ռազմական կցորդը կուղարկվի Երևանում Ֆրանսիայի դեսպանություն։ Նաև մենք շուտով մեր հյուպատոսությունը կբացենք Սյունիքի մարզում»,- հայտարարել է Ֆրանսիայի արտաքին քաղաքական գերատեսչության ղեկավարը։ Թե կոնկրետ որտեղ է տեղակայվելու հյուպատոսությունը, ֆրանսիացի նախարարը չի մանրամասնել։ 

Ֆրանսիայի ԱԳ նախարարը նաև անդրադարձել է Ֆրանսիայի կողմից Հայաստանի տարածքային ամբողջականությանը ցուցաբերվող աջակցությանը՝ շեշտելով, որ Ադրբեջանի ռազմական ագրեսիայի ընթացքում Ռուսաստանը մենակ է թողել Հայաստանին։

«Այն, որ Ռուսաստանը հրաժարվել է Հայաստանից և իր մեղսակցությունն ունի Ադրբեջանի ռազմական գործողություններին, էլ ավելի անհրաժեշտ են դարձնում միջազգային դիվանագիտական գործողությունները: Ֆրանսիայի կողքին, հուսով եմ, որ կտեսնենք Եվրոպային, նա պետք է ի գիտություն ընդունի այս իրողությունը, գործի մեզ հետ՝ հարգելու Հայաստանի տարածքային ամբողջականությունը և պահպանելու Ղարաբաղի հայերի ապրելու իրավունքը։ Ահա թե ինչ ենք անում»,- նշել է Կոլոնան։

Ներկայում Կապանում գործում է Իրանի գլխավոր հյուպատոսությունը, որը բացվել է 2022 թվականի հոկտեմբերի 21-ին՝ Հայաստանի արտաքին գործերի նախարար Արարատ Միրզոյանի և Իրանի արտաքին գործերի նախարար Հոսեյն Ամիր Աբդոլահյանի մասնակցությամբ։ Այս տարվա մայիսին նման մտադրությամբ հանդես էր եկել նաև Ռուսաստանը, սակայն այն դեռևս չի բացվել։

Լուսանկարը՝ sortiraparis.com-ից