Տեսանյութեր
Լուսանկարներ
«Եվրոպացիները հանուն Արցախի». բողոքի ցույցեր եվրոպական քաղաքներում
Սեպտեմբերին Արցախում Ադրբեջանի կողմից ձեռնարկված հարձակումը, որի հետևանքով գրեթե ամբողջությամբ հայաթափվել է Արցախը, բողոքի ակցիաների պատճառ է դարձել ոչ միայն օտարերկրյա պետություններում հայերի, այլև օտարազգիների շրջանում։ Դրանցից մեկը «Եվրոպացիները հանուն Արցախի» շարժումն է, որը Եվրոպայում միավորում է Արցախի բնակչության մարդասիրական խնդիրներով անհանգստացած եվրոպացիներին և տեղի հայկական կառույցներին։
Ի սկզբանե նախատեսվում էր, որ շարժումը 2023 թվականի հոկտեմբերի 1-ին միայն Բրյուսելում՝ ի սատարումն Արցախի ու այնտեղ առկա հումանիտար ճգնաժամի, մոբիլիզացիոն միջոցառում կիրականացնի։ Սակայն 2023 թվականի սեպտեմբերյան հարձակումը ընդլայնեց բողոքի ակցիաների աշխարհագրությունն ու տարածվեց ողջ Եվրոպայում։
The Armenian community of UK staged a protest today to say NO to the ethnic cleansing in Artsakh (Nagorno-Karabakh) by Azerbaijan. The community gathered in front of 10 Downing Street and the European Union Delegation Office. pic.twitter.com/vzre3iBObi
— ANC UK (@ANCUK_org) September 30, 2023
Բողոքի առաջին ակցիան կայացել է սեպտեմբերի 30-ին՝ Լոնդոնում: Ակցիայի մասնակիցները հավաքվել են Դաունինգ սթրիթի 10-ի (Մեծ Բրիտանիայի վարչապետի նստավայրը- խմբ.) և Մեծ Բրիտանիայում ԵՄ պատվիրակության գրասենյակի մոտ։
Իսկ արդեն այսօր՝ հոկտեմբերի 1-ին, համաժամանակյա ակցիաներ են ընթանում Մարսելում, Բրյուսելում, Նիկոսիայում, Աթենքում, Վալանսում, Կլերմոն-Ֆերանում, Կոպենհագենում, Վիեննայում, Ստոկհոլմում, Սոֆիայում, Պլովդիվում, Ռուսեում, Վառնայում, Լիսաբոնում և Պրահայում։ Միայն Բրյուսելում ակցիային մասնակցել է մոտ 15 000 մարդ։
Von "Europeans for Artsakh" gibt es mehrere Proteste in europäischen Städten. pic.twitter.com/uY0Z1Xn7Bz
— Anna Aridzanjan (@textautomat) September 29, 2023
«Եվրոպացիները հանուն Արցախի» շարժումը միավորում է Եվրոպայի հայկական համայնքների և ավելի քան 500 եվրոպական կառույցների ներկայացուցիչներին։ Եվրոպական քաղաքներում այս ակցիաները կայանում են նաև Եվրոպական քաղաքական համայնքի՝ հոկտեմբերի 5-ին կայանալիք երրորդ գագաթնաժողովին ընդառաջ, որի շրջանակներում նախատեսվում է Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը Եվրոպական խորհրդի նախագահ Շառլ Միշելի, Ֆրանսիայի նախագահ Էմանուել Մակրոնի և Գերմանիայի կանցլեր Օլաֆ Շոլցի մասնակցությամբ։
Ֆրանսիայի Մարսել քաղաքում բողոքի ակցիային մասնակցել է ավելի քան 5000 մարդ։ Ներկա են եղել ֆրանսիական իշխանության ներկայացուցիչներ, պատգամավորներ, սենատորներ, ՀՀ հյուպատոսը և ակտիվիստներ։ Բացի այդ, ակցիային մասնակցել են նաև քրդական ու կիպրական համայնքի ներկայացուցիչներ և Փընար Սելեքի աջակցության կոմիտեն։
Ելույթների ընթացքում պատգամավորները հիշեցրել են Ֆրանսիայի աջակցության և Էրդողանի, Ալիևի ու նրանց հարազատների ակտիվների սառեցման անհրաժեշտության մասին։ Առաջարկվել է նաև լուծարել Ադրբեջանի հետ Ֆրանսիայի համերաշխության ասոցիացիաները։ Ի հավելումն, ակցիայի մասնակիցները Ֆրանսիայի պաշտպանության նախարարությանը կոչ են արել զենք տրամադրել Հայաստանին՝ իր տարածքային ամբողջականությունը պաշտպանելու համար։
Ինչպես նշվում է նախաձեռնության պաշտոնական կայքէջում, շարժման մասնակիցները դատապարտում են Ադրբեջանի էթնիկ զտումների քաղաքականությունն Արցախում, դատապարտում են Ադրբեջանին և ռուս խաղաղապահներին՝ 2020 թվականի նոյեմբերի 9-ի եռակողմ հայտարարությամբ ստանձնած պարտավորությունները չկատարելու, այդ թվում նաև արցախահայության անվտանգությունն՝ իր իսկ հայրենիքում չապահովելու համար, ԵՄ-ից պահանջում են թիրախային պատժամիջոցներ կիրառել Ադրբեջանի ռազմաքաղաքական ղեկավարության նկատմամբ՝ Արցախի բնիկ հայ բնակչության նկատմամբ էթնիկ զտումների քաղաքականության և վերջինիս բռնի տեղահանման համար, պահանջում են անհապաղ պատասխանատվության ենթարկել բոլոր այն պաշտոնյաներին, ովքեր պաշտպանել են Արցախն Ադրբեջանին «ինտեգրելու» քաղաքականությունը, քանի որ դա օժանդակել է Ադրբեջանի ցեղասպան քաղաքականությանն արցախահայության նկատմամբ։ Պահանջում են, որ Ադրբեջանը անհապաղ և անվերապահորեն ազատ արձակի բոլոր հայ գերիներին, ռազմագերիներին և պատասխանատվության ենթարկվի ռազմական հանցագործությունների և մարդու իրավունքների խախտումների համար 2020 թվականի պատերազմի ընթացքում և դրանից հետո։
Գլխավոր լուսանկարում Լոնդոնում սեպտեմբերի 24-ին կայացած բողոքի ակցիայի կադրերից է/Alphanews-ից
Մեկնաբանել