Հավաքական անվտանգության պայմանագրի կազմակերպությունից հնարավոր դուրս գալու մասին Երևանից հնչող հայտարարությունները Հայաստանի ղեկավարության ինքնիշխան ընտրությունն են:

Այդ մասին լրագրողներին հայտարարել է ՌԴ ԱԳ նախարար Սերգեյ Լավրովը՝ «Վալդայ» միջազգային քննարկումների ակումբի 20-րդ ամենամյա նիստի շրջանակներում։

«Ինչպես հայտարարել են Հայաստանի որոշ ղեկավարներ, եթե հիմա, հիասթափվելով Ռուսաստանից և ՀԱՊԿ-ից, նրանք կնայեն այլ տեղ՝ ամրապնդելու իրենց անվտանգությունը, դա կլինի նրանց ինքնիշխան ընտրությունը, Հայաստանի ղեկավարության ընտրությունը»,- հայտարարել է ՌԴ արտաքին գերատեսչության ղեկավարը:

Լավրովը նաև հայտարարել է, որ Մոսկվան հույս ունի, որ կապերը, որոնք դարերով գոյություն են ունեցել հայ և ռուս ժողովուրդների միջև, չեն քանդվի։

Այդուհանդերձ, ՀՀ պաշտոնյաների և որևէ մեկը մինչ օրս բացահայտ չի հայտարարել, որ Հայաստանը պատրաստվում է դուրս գալ ՀԱՊԿ-ից։ Իրենց ելույթներում և հարցազրույցներում նրանք քննադատել են Հայաստանի ինքնիշխան տարածքի վրա Ադրբեջանի հարձակումների ժամանակ այս կազմակերպության պասիվությունը, սակայն բացահայտորեն չեն հայտարարել դրա կազմից դուրս գալու Երևանի պլանների մասին։

Լուսանկարը՝ ՌԴ ԱԳՆ մամուլի ծառայության