Ադրբեջանի նախագահի հատուկ հանձնարարություններով ներկայացուցիչ Խալաֆ Խալաֆովը երեքշաբթի երեկոյան կմեկնի Իրանի մայրաքաղաք Թեհրան։ Այդ մասին հայտնում է Nour News պորտալը՝ հղում անելով իր աղբյուրներին։ 

Պարբերականի տվյալներով՝ Խալաֆովը նախատեսում է հանդիպել իրանցի բարձրաստիճան պաշտոնյաների հետ և քննարկել նրանց հետ տարածաշրջանում առկա իրավիճակը։ Թե կոնկրետ ում հետ է հանդիպելու Ադրբեջանի նախագահի ներկայացուցիչը, չի նշվում։ 

Հիշեցնենք, որ հոկտեմբերի 1-ից Թեհրանում է նաև Հայաստանի անվտանգության խորհրդի քարտուղար Արմեն Գրիգորյանը։ Իր այցի ընթացքում նա արդեն իսկ հասցրել է հանդիպել իր իրանցի գործընկերոջ՝ Ալի Աքբար Ահմադիյանի, արտաքին գործերի նախարար Հոսեյն Ամիր Աբդոլահյանի ու Իրանի նախագահ Էբրահիմ Ռայիսիի հետ։

Լուսանկարը՝ APA գործակալության