Մոսկվան Բաքվի հետ կքննարկի Լեռնային Ղարաբաղում ռուս խաղաղապահների հետագա ճակատագիրը, բայց կշարունակի նաև շփումները Երևանի հետ։ Այդ մասին ТАСС գործակալության փոխանցմամբ լրագրողներին հայտարարել է ՌԴ նախագահի մամուլի քարտուղար Դմիտրի Պեսկովը։ 

«Հիմա իսկապես նրանք (ՌԴ խաղաղապահները, խմբ.) դե ֆակտո և դե յուրե գտնվում են Ադրբեջանի տարածքում: Դա ընդունում է նաև Հայաստանի վարչապետ Փաշինյանը։ Ինչ վերաբերվում է նրանց գտնվելու հետագա ռեժիմին և դրան ուղեկցող բոլոր գործընթացներին, ապա, իհարկե, դա կքննարկվի ադրբեջանական կողմի հետ»,- հայտարարել է Պեսկովը։ Ըստ նրա՝ «ՌԴ-ն կշարունակի շփումները նաև հայ ընկերների հետ»։

Կրեմլի ներկայացուցիչը հստակեցրել է, որ ՌԴ նախագահ Վլադիմիր Պուտինի և Նիկոլ Փաշինյանի հեռախոսազրույցի ժամանակ ռուսական խաղաղապահ զորախմբի վերատեղակայման հնարավորության հարցը չի քննարկվել: 

Հիշեցնենք, որ նախօրեին Հանրային հեռուստաընկերությանը տված հարցազրույցում վարչապետ Նիկոլ Փաշինյանը հայտարարել էր, որ եթե ռուսական խաղաղապահ անձնակազմը դուրս գա Լեռնային Ղարաբաղից, ապա պետք է վերադառնա Ռուսաստան և ոչ թե տեղակայվի ՀՀ տարածքում։

Լուսանկարը՝ РИА Новости / Сергей Гунеев