ԱՄՆ-ում հուլիսի 30-ին մոտ 4 միլիոն տուն մնացել է առանց էլեկտրաէներգիայի՝ մոլեգին կայծակների ու փոթորիկների հետևանքով:

Փոթորիկները մոլեգնել են Ինդիանա նահանգում, ապա տեղափոխվել Օհայո և Արևմտյան Վիրջինիա: Վիրջինիայում էլեկտրաէներգիայի մատակարարման խափանումների պատճառով տուժել է ավելի քան 1 մլն տուն:

Միաժամանակ ԱՄՆ-ի կենտրոնական և արևելյան նահանգներում, որտեղ ապրում են տասնյակ միլիոնավոր մարդիկ, այս ամռանը գրանցվում է օդի չափազանց բարձր ջերմաստիճան: Հունիսի 29-ին Կանզասից մինչև Վաշինգտոն ընկած տարածքներում գրանցվել է 100 աստիճան ֆարենհեյթի սանդղակով:

Վկայակոչելով ԱՄՆ ազգային օդերևութաբանական ծառայության տվյալները՝ CNN-ը տեղեկացնում է, որ օդի բարձր ջերմաստիճանը նպաստում է ԱՄՆ-ում որոտացող ուժեղ կայծակներին՝ առաջացնելով շանթեր ու քամիներ:

Միսուրիի իրավապահները հետաքննում են մահվան 3 դեպք, որոնք կարող են հետևանք լինել օդի չափազանց բարձր ջերմաստիճանի: