Կառավարության հետ հարցուպատասխանի ժամանակ պատգամավոր Գևորգ Պապոյանը Ներքին գործերի նախարարից հետաքրքրվեց, թե ինչ գործընթացներ են իրականացվում Արցախից բռնի տեղահանվածների հետ Հայաստան ենթադրաբար բերված օրինական կամ ոչ օրինական զենքի հետ: Եթե օրինական զենք է՝ հնարավո՞ր է այն հաշվառել, գիտե՞ն դրա տեղը, թե՝ ոչ:

Նախարար Վահե Ղազարյանն ասաց, որ նման տեղեկություններ ստանում են, որ Արցախի Հանրապետությունից զենք-զինամթերք է մուտք գործել Հայաստան: Նախարարն «Արցախի Հանրապետություն» ասելուց հետո ինքն իրեն շտկեց՝ ասելով «Լեռնային Ղարաբաղ»:

Արդեն կան դեպքեր, երբ մարդիկ կամավոր հանձնում են զենք-զինամթերքը: 3 օրվա ընթացքում 4 ատրճանակ և 2 հարթափող զենք է հանձնվել: Ոստիկանապետի կողմից տրվել են ցուցումներ՝ մարդկանց կոչ անելու հանձնել անօրինական զենքերը:

Ինչ վերաբերում է օրինական զենքին, ապա նախարար Ղազարյանը նշեց, որ Հայաստանից ձեռք բերված զենքի վերաբերյալ տեղեկություններ ունեն, իսկ Ղարաբաղից ձեռք բերվածի վերաբերյալ տեղեկություններ չունեն: