Տաթև Աղաբաբյանը, երկար տարիներ Գերմանիայում բնակվելուց հետո, արդեն 6 տարի ապրում և աշխատում է Դեբեդ գյուղում՝ աշխատատեղ ստեղծելով նաև գյուղի կանանց համար։ 

2020 թվականին Տաթևի նախաձեռնությամբ Դեբեդ գյուղում բացվեց Debed co-living and working house-ը, այսօր արդեն տանը զուգահեռ գործում է Perle ռեստորանը, որի բացումը եղավ հոկտեմբերի 28-ին։

Տաթևը 12 աշխատատեղ է ստեղծել գյուղի  կանանց համար՝ անձամբ սովորեցնելով նրանց խոհարարություն, հացագործություն։

Ռեստորանի ճաշացանկն իր հիշողություններն են՝ տեղական մթերքներով ու աշխատուժով։ 

Տաթև Աղաբաբյան

«Սա պատմություն չէ ծայրահեղ հայրենասիրության մասին, սա շատ ռացիոնալ դատողությունների շարան է, և ես կուզեի, որ բոլորը ոգեշնչվեն իմ օրինակով։ Հայաստանը ունի շատ թաքնված պոտենցիալ, և այստեղ դու կարող ես ավելի մեծ հաջողությունների հասնել, քան մի շարք զարգացած երկրներում»,- նշում է Տաթևը՝ ընդգծելով, որ  այս աշխատանքում շատ է կարևորում կնոջ ստեղծարար պոտենցիալը։

Ռեստորանի բացումն ուղեկցվեց ցուցահանդեսով, որտեղ ներկայացված էին 5 երիտասարդ արվեստագետների աշխատանքներ։ 

«Պարտադիր չէ գնալ պատկերասրահներ՝ նկարները լուրջ հայացքով նայելու, դուք կարող եք ձեր ընկերների հետ ժամանակ անցկացնել ու ծանոթանալ արվեստի հետ»,- նշում է ցուցահանդեսի կազմակերպիչ Էմմա Հարությունյանը և հավելում, որ ցուցահանդեսի նպատակը ճանաչողությունն է, քանի որ մենք չգիտենք՝ ինչ տաղանդավոր մարդիկ են մեզ շրջապատում։ 

Էմմա Հարությունյան